Parlamentario hulandes ta cuestiona asunto di WEB serca gobierno Hulandes

DEN HAAG – Parlamentario hulandes Andre Bosman (VVD), a manda un serie di pregunta pa minister hulandes Henk Kamp (minister asuntonan economico), riba e situacion di cortamento di meter di awa di WEB y miles di abonadonan atrasa den nan pago. Mientras cu e ta conciente cu ta algo netamente local, y cu no ta usual cu Hulanda lo mete, e tin su motibo. Segun Bosman a splica NoticiaCla.com awe mainta. “E ta un ehempel atrobe di mal gobernacion na Aruba” ,Bosman a contesta.

SERIE DI PREGUNTA

Den e serie di 5 pregunta, Bosman ta puntra entre otro si e mandatario ta na altura di e situacion (pa medio di prensa local di Aruba, Amigoe), y cu si e ta comparti cu e maneho na WEB ta un desaster. Y si e no ta pensa esaki, pakico. Tambe a puntra entre otro ken ta responsabel pa e problemanan administrativo na WEB. Y finalmente si e gastonan cu a surgi door di problemanan administrativo, no por sali di operacionnan regula. Y si esey ta e caso, si e ta bay percura pa esey y si no, pakico no. E parlamentario a pidi pa haya contesta pa 8 di december proximo caba.

MAL GOBERNACION

Segun Bosman a splica NoticiaCla.com awe mainta, esaki ta un ehempel di mal gobernacion na Aruba. “WEB ta un NV di gobierno unda cu ta hopi cla cu gobierno di Aruba no tin un idea kico ta pasando, cu consecuencia cu Aruba ta bira e victima. “Pues no ta solamente e presupuesto ta problematico, sino tambe otro actividadnan cu un responsabilidad di gobierno ta cay, ta un desorden”, Bosman a splica NoticiaCla.com. E pregunta a bin, mirando cu no ta normal cu un politico hulandes ta mete cu asuntonan interno di un pais manera esaki. Y a base di esaki, a puntra e mandatario kico su interes ta den e asunto aki.

REPRESENTACION DI VVD OF BOSMAN SO

E hecho cu Bosman, conoci pa su preguntanan den direccion di asuntonan di Aruba, ta bisa di ta papia cu VVD ta precupa, a crea e pregunta, cu si ta Bosman so, of enberdad VVD completo ta para su tras. Riba esaki, Bosman a contesta. “Mi ta representa henter fraccion di VVD. Den politica hulandes no ta asina cu cada miembro ta vocifera su mes independientemente riba tur asunto” e parlamentario a splica NoticiaCla.com. “Un punto di bista ta wordo determina den e fraccion, y cu esey tur hende ta di acuerdo". "Fraccion di VVD den Tweede Kamer ta para completamente mi tras y ta di acuerdo cumi” ,Bosman a sigura NoticiaCla.com, riba tambe e asunto di WEB. (lesa e preguntanan aki)