Interes pa kavel di carnaval ta hopi abou

ORANJESTAD - Interes pa compra di kavel (tin 200 kavel disponibel) pa carnaval ta abou e aña aki. Miembro di management team di Directie Infrastructuur en Planning (DIP), Isabel Dammers a confirma esaki awe mainta pa NoticiaCla.com. Si pa carnaval 61, tabatin mas of menos 17.000 peticion na tur, e aña aki esey a resulta hopi menos. pa dia mas of menos 1.600 peticion ta drentando, y te cu awe, e cantidad di peticion ta na algo riba 4800 mil na tur, compara cu 3400 pa dia pa carnaval 61. Segun Dammers, e interes por ta abou pasobra hendenan no ta den 'mood' di carnaval ainda cu ta comprendibel. Ta temporada di pasco, y como tal esey ta manda aworaki. E realidad ta tambe cu antes tabata tene e proceso di kavel ora cu aña bolter. Den e caso aki, esey no ta posibel mas. Mirando e tempo cortico di carnaval, mester a mantene e tempo segun e schedule, cu , segun calculacion di DIP, ta trece nos na e siman aki. Y ta pesey e siman aki caba e proceso a cuminsa. 

OTRO SIMAN

Otro siman notario ta saca e nombernan (dia 8 di december), despues di cual esaki lo keda publica den medionan di comunicacion. Y asina aña bolter, pa 9 di januari ta cuminsa 'otorga' e permisonan segun orden cu tambe lo keda publica. Un siman despues, pa dia 16 di januari 2016, esnan cu tin un permiso pa kavel, lo por cuminsa instala nan mes riba e respectivo kavelnan. 

E PROCESO 

Tabata comienso di e siman aki cu NoticiaCla.com a trece e relato di e comienso di proceso di kavel. Na e ocasion ey, a mustra cu Directie Infrastructuur en Planning (DIP) a informa tur hende caba, di e reglanan cu tin rond di esaki. Entre e informacion, Dammers a confirma cu pueblo por a cuminsa cumpra peticion pa kavel na DIP entre dialuna 30 di november (dialuna ultimo) pa 4 di december proximo. Diamars 8 di december lo saca e nomber di personanan cu ta bin na remarca pa un kavel. Cada peticion ta costa 4 florin, y cada persona tin derecho riba solamente un kavel. (Pa mas informacion por haya e documento completo lesa aki.)