Mayoria cliente a paga, grupito cu chens pa perde meter

BALASHI – “Mayoria cliente a reacciona riba e recordatorio y a paga nan awa”. Asina vocero di e compania di utilidad WEB, Asja Dongen a confirma na NoticiaCla.com awe mainta. Segun Dongen, ainda tin un grupo chikito cu no a cumpli cu e deadline .” Nan ta core riesgo den e dianan aki cu ta bay keda sin awa” e vocero a sigui bisa. Pa loke ta e asunto di problema laboral na e compania, Dongen a splica cu e situacion ey ta ‘status quo’. “ Directie y sindicato ta den consulta cu otro” Dongen a sigura NoticiaCla.com.

PAGO DI AWA

Manera ta conoci, siman pasa e compania a manda comunicado alertando di un situacion cu por surgi, si un cantidad grandi di cliente no paga nan cuentanan atrasa. E cantidad a ‘spanta’ hopi hende ora cu a bisa cu ta por lo menos 12.000 persona ta cay bou di e categoria aki. Nan lo a haya un carta e diasabra ey (siman pasa) y tabatin dos dia pa paga (cu a vence diamars), sino cuminsando diaranson (awe), nan lo a haya nan meter di awa kita. Sinembargo clarificacion di Dongen dialuna na NoticiaCla.com-merdia (e version radial di e website) na Power FM, no tabata asina cu lo a bay manda 12.000 carta diasabra ultimo. “Nos no por handle esey. Ta un cantidad di 2.000 carta a wordo manda diasabra. E resto lo haya carta tambe, pero den e simannan cu ta bin” Dongen a sigura NoticiaCla-merdia e momento ey. Pero e no por a sigura cu ta nifica cu tur e proximo diasabra nan, e cartanan lo sali. Lo sigui manda carta si, te ora cu yega e cantidad di 12.000 cliente cu tin retraso. Ta trata mas bien di cliente cu tin un cierto suma habri, y cu WEB lo kier mira paga mas pronto cu ta posibel. Durante e dos dianan cu a pasa, Dongen a confirma cu mientras cu enberdad tabata hopi druk na WEB, tur cos tabata bou di control. Riba e mesun tema, (lesa otro articulo), fraccion di MEP den parlamento a pidi un reunion pa atende e tema di cantidad di recibo habri na WEB.

SITUACION LABORAL

Mes momento tabatin un situacion laboral cu a surgi ora cu diamars mainta tempran, trahadonan disgusta di WEB a sali pafo pa mustra nan malcontento segun sr Henriquez, presidente di e sindicato SIWA. Den un declaracion na prensa ayera, el a mustra cu e situacion ta un asunto cu ta andando y cu nan kier solucion p'e. Dongen, riba pregunta di NoticiaCla.com, a splica cu no por papia di un welga, sino un reunion informativo cu e trahadonan a tene. Awe, e sindicato ta den reunion cu directiva, pa haya un solucion riba e tema ey.