ED-card electronico por bira Aruba su version di ESTA den futuro

ORANJESTAD – E intencion ta pa e ED card cu a keda introduci diamars anochi, (lesa articulo aki), tambe e bira un tipo di documento ‘ESTA’, esta e documento cu Merca ta pone bishitantenan yena, como un pre-screening pa nan bishita. Riba su pagina di Facebook, minister di turismo Otmar Oduber a compara e carchi aki como e documento conoci como e ESTA mericano. “E ta similar na e ESTA cu nos ta yena ora di bay Merca, y e ta facilita hopi e proceso tanto pa turista como agentenan di imigracion mes” e mandatario a skirbi. Ora cu NoticiaCla.com a acerca e mandatario pa puntra si esaki awor caba ta e version di Aruba di ESTA, esta cu por us'e como un pre-control pa screen turistanan y eventualmente nenga nan si mester.

NO POR PRE-SCREEN AINDA CU ED-CARD

Riba esaki, e mandatario a reacciona bisando cu no. “ No. Mi a splica cu e forma di aplica p'e ta manera ESTA, esta online unda cu bo ta print e y bin cu ne” Oduber a splica. “Ainda e no ta un tipo di pre-screening, pero cu esey ta e intencion den e añanan nos dilanti”. E pregunta a bin a rais di informacion cu gobierno lo kier mehora e control na entrada di Aruba, en bista di e problema actual di Venezolanonan cu ta raspa y causa problema na Aruba.

LO UPGRADE Y HACI’E UN TIPO DI ESTA

Pero e mandatario a mustra cu ora cu a cuminsa traha riba e plan di e ED card electronico, esaki ta mas cu un aña den planeacion. “Mas cu un aña pasa no tabatin e problema di  Venezolanonan cu tin awor” Oduber a bisa. E meta cu a traha riba dje, segun e mandatario, ta pa por digitalisa y baha gasto di aerolineanan, baha gasto di print e documentonan y pa haci e experiencia di e turista mas placentero. “Nos ta bay upgrade e y nos ta bay enberdad us'e manera un ESTA unda cu bo ta pre-screen y por nenga hende di bin prome cu nan yega Aruba”