ED-card electronico pa turista yena prome cu drenta Aruba

ORANJESTAD - Entrante diamars 1 di december, IASA (Instituto Alarma y Seguridad Aruba) bou kende Departamento di Imigracion ta resorta, hunto cu Aruba Tourism Authority y Gamma a introduci un servicio nobo. E servicio nobo y moderno ta brinda turistanan e opcion pa yena e ‘Embarkation and Disembarkation card’ conoci tambe como e ‘ED-Card’ den forma digital via internet, prome cu yega nos isla.

ED CARD ANTERIOR

Te cu awor, ta duna e pasaheronan e ED-Card ora di check in na e aerolinea of hasta riba avion, algun rato prome cu aterisa riba nos isla. Esey ta haci cu den avion ta core yen'e, den cual ta inclui nomber completo, number di paspoort, nacionalidad, cantidad di dianan cu ta keda, unda ta hospeda na Aruba y asina por sigui menciona.

REDUCCION USO DI PAPEL

Cu e cambio, awor pasaheronan tin e opcion pa prome cu biaha pa Aruba, subi online riba www.edcardaruba.aw asina cu nan reserva nan pasashi, pa yena e informacionnan rekeri pa Departamento di Inmigracion. Ademas, esaki ta reduci e uzo di papel, Aruba ta sigui enfoca riba inovacion y servicio mas eficiente pa nos bishitantenan.

BENEFICIO DI ED CARD AWOR

Famia, parehanan y amigonan yegando Aruba, hunto cu lidernan di e industria di biahe sin duda lo aprecia e ED-Card digital aki, cu ta ofrece bishitantenan e oportunidad pa completa tur informacion rekeri na un forma facil y combiniente prome cu embarca e vuelo. E servicio aki ta yuda disminui tambe filanan na Inmigracion na yegada na Aruba, permitiendo nos bishitantenan di ta gosando di nos playanan entre otro na un manera mas rapido. Adicionalmente, e ED-Card digital ta brinda e biaheronan oportunidad pa haya mas informacion di Aruba, di tur evento y actividad, hasta prome cu nan yega nos isla.

OBLIGACION PA LEY

Manera ta conoci, ley ta prescribi cu tur turista yegando nos isla mester yena e formulario aki, esta e ED-Card. Pa awor e carchi original lo sigui existi como un opcion pa e turista mes dicidi, sea ta yena e carchi fisicamente of ta yen'e online. Pa esunnan cu scoge e opcion digital, por haci esaki for di momento cu cumpra nan pasashi of te cu 48 ora prome cu bin Aruba. Despues di esey, nan lo mester yena e carchi na momento di nan entrada na nos isla. Cu e servicio nobo aki presenta pa Departamento di Imigracion y Aruba Tourism Authority, atrobe nos isla ta diferencia for di otronan den e region. E enfoke inovativo aki, sin duda lo surpasa expectativa di nos bishitantenan.