Boto perdi no tabatin permit pa nabega pafo di awa teritorial di Aruba

ORANJESTAD — E speedboat cu nuebe hende abordo, cu diahuebs ultimo, a perde despues di fayo di motor na caminda pa Venezuela, no tabata permit pa sali di awanan teritorial di Aruba. Asina directie Scheepvaart a bisa. E boto no tabata disponi di e medidanan di seguridad manera un radio y un GPS. Asina e raportahe di partner di NoticiaCla.com, Caribisch Netwerk, ta raporta.

E INCIDENTE

Diahuebs e boto di placer La Rumbera, cu tabata na caminda pa Las Piedras, raporta como perdi. E boto no tabata leu di su destinacion, ora cu e dos motornan exterior a cay afo, probablemente pa motibo di gasoline. No mucho tempo despues, a cuminsa un accion di buskeda pa kustwacht di Aruba y Corsou. Kustwacht di Colombia y Venezuela a uni despues, segun e raportahe.

VENEZUELA NO A COOPERA

Na prome instancia, autoridad Venezolano no tabata kier pa e avion di kustwacht, drenta na espacio aereo. Esaki, no obstante un acuerdo di ‘search and rescue’ entre Venezuela y Reino Hulandes. “Nos a insisti pa busca ey tambe, pero nan tabata insisti cu nan lo a busca den nan area y nos den nos area” segun Randy Paskel, hefe di kustwacht na Aruba.

Despues di intervencion di ministerio di relacionnan exterior di Hulanda, kustwacht a haya permiso te diadomingo mainta, pa busca riba awanan venezolano na La Rumbera. Tanto Paskel, como Carlyle de Coteau, director di Directie Scheepvaart, a indica cu e buskeda lo a avansa mas, si Venezuela a duna permiso mesora. “Esey tambe de hecho, ta e motibo cu nan (e boto) a drief bay te Colombia” de Coteau a bisa.

Finalmente e nuebe naufragonan a yega den seguridad, ora cu nan a drief suficientemente cerca di e costa di Punta Espada na Colombia, pa a landa yega eynan. Unabes na tera, nan a wordo ricibi pa e tribu local Wayuu cu na nan turno, a informa autoridad Colombiano.

SIN RADIO OF GPS

Tanto Paskel como de Coteau a confirma cu La Rumbera no tabatin GPS of radio abordo. Segun de Coteau, esey no ta straño, mirando cu formalmente e speedboat, no ta permiti pa navega pafo di awanan teritorial di Aruba. “Pero ya, bo no por stop hende di haci coi bobo”. Cu la Rumbera a biaha, cu tanto pasahero, pa un destinacion, pa cual e no ta formalmente permiti pa haci, segun de Coteau y Paskel, ta dificil pa controla entre e trafico ocupa di bapor.

BAHIA VERSUS LAMAN GRANDI

De Coteau ta bisa cu, contrario na otro islanan cu tin bahianan, Aruba tin solamente lama ‘habri’ pa nabega di forma ‘recreativo’. Esey ta nifica cu cos por bay robez mesora. “P'esey ta importante pa tin aparatonan di seguridad y cu bo sa bon kico pa haci”. Como ehempel ta menciona cu e capitan, ora cu e tabatin e coneccion, a manda whatsapp, pero e no tabata sa di e number di alarma 913, cu cual via sateliet, por yama kustwacht.

LEY NOBO

De Coteau ta referi na un ley nobo di nabegacion, cu ta cla pa hopi luna caba, pero no a yega parlamento ainda pa aprobacion. Den e ley ey tambe ta para cu botonan di placer, cu ta permiti pa nabega solamente den awanan teritorial di Aruba, mester tin ekiponan di seguridad y un radio. Presidente di comision permanente di parlamento Chris Dammers, a anuncia ayera mainta, cu e lo tene un reunion di urgencia, dentro di poco, cu minister di transporte, pa evita tipo di incidentenan den futuro.

Di Caribisch Netwerk. Autor: Ariën Rasmijn