MEP a pidi reunion riba tema di cortamento di meter di awa di WEB

ORANJESTAD – Fraccion di MEP den parlamento a pidi reunion urgente, unda cu ta pidi pa minister Mike de Meza di utilidad, duna cuenta riba e asunto di 12.000 famia cu no por paga nan awa. Manera ta conoci for di siman pasa e compania di utilidad WEB a manda comunicado alertando posibel kitamento di meter di awa, pa un cantidad grandi di persona. Esey a crea un consternacion den comunidad, y den e cuadro aki, e fraccion kier claridad.

CONFIRMACION CU COSTO DI BIDA A SUBI

Segun fraccion “ logicamente esaki ta confirma y ta señal cu costo di bida a aumenta den ultimo 6 añanan como consecuencia di tanto medida cu Gobierno di AVP a bin cu ne, creando problemanan pa ciudadanonan por logra cumpli cu pago di awa y coriente cu ta cai bou necesidadnan basico” e comunicado di e fraccion ta bisa. Segun e partido, ta ironico cu nos prome minister ta pretende cu e ta combatiendo pobresa, siendo cu tipo di noticianan aki ta hustamente confirmando e situacion social crea door di Gabinete Eman. Y ta mas ironico ainda cu Mike Eman ta declara cu e ta orguyoso di tur esaki. E peticion pa e reunion a wordo haci diamars mainta y mirando e caracter di urgencia, e fraccion ta spera cu presidente di parlamento yama e reunion aki lihe. (Mira e carta cu MEP a manda, aki)