Abogado Peppie Sulvaran: “Robbie (Dos Santos) no ta mata un musca!”

WILLEMSTAD – “Nos a verwacht esaki. Hendenan aki ta traha cu testigo cu ta haci bruha” ta prome declaracion di abogado “Peppie Sulvaran” riba su cliente Robbie Dos Santos cu a keda deteni diamars mainta na su cas na Corsou. Esaki ta den cuadro di e investigacion riba e posibel autor di morto riba politico Helmin Wiels aña pasa. Segun Sulvaran nan sera deal cu hende pa duna declaracion falso. “Robbie no ta mata un muskita” su abogado a bisa. “E ta un abuso. Loke nan kier haci ta mata e homber aki” refiriendo na su cliente Dos Santos. Henter e dossier segun e abogado, ta basa riba hendenan cu no kier divulga nan fuente, y ta hende cu ta papia cu spirito. “E cosnan aki tin cu caba na Corsou. E cosnan aki ta abuso nan ta y persecusion politico. E homber aki ta un bendedor di number e ta” Sulvaran a sigui bisa. Ta for di dia cu a mata Helmin Wiels, premier di Corsou Ivar Asjes lo a declara sin prueba, cu tin cu busca e culpabel den e huki di loteria. Esey ta segun declaracion di e abogado di Dos Santos na momento di e detencion di su cliente. “Ta na Corsou so bo ta coi un ex minister sera riba casi nada sin tene cuenta cu bo ta daña nomber di bo pais” Sulvaran a bisa. E ta sigura cu Dos Santos no ta envolvi mas cu e partido politico Movimento Futuro Korsou, di cual ta wordo bisa cu Dos Santos lo a financia e partido. Sulvaran ta admiti cu e ruman di Dos Santos, -George Jamaloodin cu tambe ta sera for di siman pasa-, ta miembro di e partido, pero cu Dos Santos mes no ta envolvi manera cu ta kere cu ta e caso.

Tabata diamars mainta 6:40 cu e ekipo investigador di e caso "Maximus" na Corsou a detene Dos Santos (56). No a descarta cu tin mas detencion cu por cay den e proximo oranan segun ministerio publico di Corsou a laga sa diamars mainta tempran. Siman pasa diahuebs su ruman, e ex minister George Jamaloodin tambe a keda aresta pa e mesun caso. Mientrastanto Jamaloodin a drenta den un welga di hamber diadomingo pa protesta su detencion. Foto di Peppie Sulvaran  ta cortesia di Kuracao Knipselkrant.com