Naufragonan di boto La Rumbera a yega Aruba porfin

ORANJESTAD – Diamars atardi, e 9 naufragonan di e boto La Rumbera, a yega Aruba porfin, unda cu nan a wordo ricibi pa director di departamento di relacionnan exterior Edwin Abath y secretaria di conseho di minister Nicole Hoevertz. Hoevertz a confirma na NoticiaCla.com cu nan a ricibi e grupo ya na porta di avion, y guia nan y facilita nan pa yega mas liher pafo pa topa cu nan respectivo famianan.

ALEGRIA CU FAMIA

Unabes pafo, tabatin un alegria inmenso unda cu famia a topa famia, amigo a topa amigo, y hopi tabatin lagrima di alegria. Caranan tur pela, kima, ta loke e 9 personanan a keda cu ne como recuerdo di nan odisea. Mientras cu un di e damanan no kier a bisa mucho, a gradici si cu nan a yega Aruba porfin y bon. E otro persona cu NoticiaCla.com a logra papia cu ne tabata Marcolino Croes. Segun Croes, loke e la siña aprecia, ta cosnan di bida, manera por tin acceso na awa, cuminda. “Un simple matras pa drumi, un television pa wak tabata un alegria pa nos” Croes a bisa.

EXPERIENCIA RIBA LAMAN

Riba e experiencia riba lama mes, Croes a mustra cu enberdad na cuminsamento e tabata hopi fastioso. “Na cuminsamento bo ta cuminsa perde. Pero no echt bira desespera” Croes a bisa. “Nos tur a keda echt hopi rustig riba e boto, enves di ‘panikia’." E tata Nilo, hopi emociona, tabata banda di su yiu y tambe a mustra su alegria "Hamas y nunca mi por a kere cu mi yiu por a pasa den un aventura asina grandi. Pero danki Dios a yud'e, Dios a yud'e”. Loke a impresiona e yiu, ta cu tanto hende a saca man pa yuda. “Preocupa, cu hendenan a te hasta cende bela pa nos. Tur hende a care”. Si e tin pensa di subi boto pa awor, Marco a bisa cu un sonrisa, "pa awor aki no”. E ta gusta lama, pero pa awor no.

FIN DI ODISEA

Cu e yegada di awe, e ta pone un fin na e odisea cu e 9 famia a pasa aden cu nan sernan keri, cu durante casi 6 dia a tene nan den tension, tristesa, despues alegria y awor trankilidad di ta bek na tera. Den e proximo dianan, nan lo posiblemente papia cu prensa mas extenso, pa duna nan version di kico tur a pasa nan. Pero pa awor, nan ta den seno familiar, gradiciendo un y tur y papa Dios, cu nan ta bek riba tera firme, y mas importante, cu nan tin nan bida.