KvK: Gobierno a confirma cu no ta bin ningun impuesto por lo pronto

ORANJESTAD – Prome minister Mike Eman a afirma na Camara di Comercio (KvK) durante un reunion recien, cu pa locual ta trata impuesto, no lo introduci ningun cambio prome cu fin di aña 2015. Y cu eventualmente prome cu bay over na implementacion cualkier proposicion pa cambio lo wordo discuti di antemano cu e partnernan social den e plataforma Dialogo Social. Tabata durante e ultimo encuentro cu e mandatario den e prome MFA (Multi Functioneel Acomodatie) na Noord, cu e mandatario toca e tema ey cu e gremio, riba nan peticion.

BASE DI INFORMACION

E base, tabata cu gobierno a informa algun tempo atras cu lo kier introduci e transactiebelasting. KvK a expresa su preocupacion pa e efecto negativo cu e impuesto aki riba transaccionnan bancario lo por trece cu ne, ya cu pa evita di paga e impuesto por opta pa haci transaccionnan cash y cana cu placa cash (cash economy) cu na su turno lo por ocasiona un crecemento den criminalidad. Pues ta aki ta unda cu Eman a afirma cu pa locual ta trata impuesto, no lo introduci ningun cambio prome cu fin di aña 2015.

ORDENACION URBANO

KvK a mustra riba e importancia di e ordenacion urbano y e necesidad pa planificacion pa sea otorgamento di permiso, establecimento di negoshi den cierto area o desaroyo di proyectonan comunitario. KvK a informa Ministro cu e plan di e ordenacion urbano, como tambe e regulacionnan y normanan pa cu esaki, tabata den un fase avansa, pero cu e implementacion a wordo poni on hold. Prome Ministro lo informa un ke otro pa por evalua si lo retoma e proyecto aki. Ta importante pa e renobacion di edificionan y scolnan y e infrastructura en general no stagna, p'esey mester conta prome cu fondonan disponibel continuo pa por haci e trabaonan necesario cu un frequencia regular.

PLATAFORMA PA INVERSION

Gobierno tin e intencion pa instala un plataforma pa stimula e clima di inversion na Aruba y lo invita algun organisacion, incluyendo KvK, pa forma parti di e grupo aki. KvK a bisa di ta aplaudi e iniciativa aki. Y un di e metanan principal lo ta pa genera divisa pa nos economia. A base di e encuentro a señala e necesidad y por lo tanto e intencion pa regularmente tin mas dialogo cu Prome Minister, cu e meta pa por trece e precupacionnan y puntonan di atencion dilanti, cu ta obstaculisa comercio en general y e crecemento di Aruba su economia.

E ENCUENTRO EN GENERAL

E encuentro aki, riba iniciativa di Eman, a bay den bon ambiente y tabata uno hopi informativo y constructivo. Ministro Presidente a elabora riba e plan y e posibilidadnan cu MFA ta brinda como un luga di encuentro pa un y tur y tambe e funcion di “one-stop-shop”, teniendo varios servicio y departamento gubernamental bou un solo dak.