Sospechoso di caso Excelsior Casino ta kibra su silencio

ORANJESTAD – Recientemente un di e personanan deteni relaciona cu e atraco di Excelsior Casino, a recobra su libertad. Ta trata di e Colombiana Joana Uribe. Recientemente el a duna un entrevista na un periodista Venezolano, cual a keda publica na varios caminda na Venezuela caba. Den e caso aki el a duna permiso na NoticiaCla.com pa reproduci esaki. Un di e motibonan pa e entrevista, ta pasobra e ta sinti cu su nomber a wordo daña, y cu e kier aclarea tur cos. NoticiaCla.com tabatin contacto cu su abogado, cu a duna ok pa e publicacion, contal cu e no bay den detayes di e caso.

E ENTREVISTA entre Joana Uribe y Yoly Ramirez

JU

- Tur periodista a lastra mi nomber te na suelo. Como tal mi ta haya e necesidad pa aclaria tur cos, pasobra mi a perde tur cos debi na esaki.

YR

-  Ma compronde cu bo tabata huur apartamento, y den e caso aki bo a haci esey cu e tres Venezolanonan envolucra den e atraco. Bo tabata conoce nan? Como nan a comunicado cu bo?

JU

-  Nan no tabata apartamento, sino cambernan den mi propio cas. Mi no tabata conoce nan. Un muher di Maracaibo, cu ya a keda na mi cas, a yama mi y a bisa mi cu e tin tres amigo di Maracaibo, y cu si mi por a hospeda nan na mi cas. Mi a bis’e cu si. Semper mi ta ricibi hende cu ta contacta mi, pa medio di otro persona cu ya a keda na mi cas. Asina e negoshi di huur a crece. Pa loke ta mi casa, e homber cu mi ta casa cu ne, mi ta separa di dje pa 2 aña caba. Mi no tin nada cu ne, y e tampoco no tin haber cu nada di esaki, y e no ta un comerciante. E ta reparti corant.

YR

-  Ma compronde cu bo ex casa a bay na autoridad y aclaria cu e no tabatin nada di haber cu, y cu de hecho boso ta separa y den proceso di divorcio. Sin embargo tabatin un persona fugitivo, y cu supuestamente tabata bo amante? Esey ta berdad, ken e persona ey tabata?

JU

-  Si mi ex casa a bay declara eynan cu e no tin nada di haber, y cu nos tabata separa pa 2 aña caba. E otro persona no ta mi amante, pasobra e ta e persona cu ken mi ta bibando dos aña caba.

YR

-  Bo tabatin pensa di huy di Aruba?

JU

-  Nunca mi a pensa di huy, paspobra aki mi ta stabil, mi tin mi cas, y mi tabatin mi trabou.

YR

E persona cu cual bo tabata biba cu ne, el a huy? El a purba scapa dado momento?

JU

-  No, no ta verdad. Loke ta pasa, ta cu e tabata illegal riba e isla, y tabatin miedo cu nan lo a deporte di nobo.

YR

-  Informacion tabata circula cu bo a bisa na trabou, cu bo mester a biaha cu urgencia pa bo pais. Esey ta berdad?

JU

-  Esey ta puro difamacion. Mi tabatin un biahe programa pa Colombia desde maart, pa 27 di november, pasobra mi yiu muher ta gradua di scol dia 28. Pero mi no por tabata presente. Mi hefe nunca no a bisa mi nada cu nan a interog'e. Ningun hende a bay haci pregunta eynan.

YR

-  Con nan a detene bo?

JU

-  Mi tabatin un bon amigo recherche. Mi a yam'e y bise cu mi tabatin un problema y cu mi mester a papia cu ne pa cont'e loke tabata pasami.  Pasobra ora cu mi a realisa via internet cu e hendenan cu tabata keda na mi cas, tabata di e robo di e casino, mi a yam'e pa puntr'e ki pa haci. Mi a bay warda di polis y el a bisa mi cu mi ta keda deteni, pasobra tin un orden di aresto contra mi. Mi a bise ‘ok’. Mi no a haci nada, y asina tabata e proceso regular di e detencion. Nan mester a verifica cu loke mi a bisa, tabata e berdad.

YR

-  Cuanto dia bo a keda cera?

JU

-  24 dia. E pio dianan di mi bida.

YR

-  Bo a keda de plena libertad? Of tin algun restriccion of medida special rond di bo libertad?

JU

-  Mi ta den plena libertad. Liber di tur cos.

YR

-  Bo sa algo di esnan implica? Con ta bayendo cu e proceso, tin informacion di e paradero di e placa horta?

JU

-  Nan ta den e proceso ey ainda. Tin proceso cu mester wordo cumpli cu ne. Nan ta den e pleno parti di investigacion, pasobra tin varios detencion mas cu a tuma lugar. E caso ta uno grandi y ta tuma su tempo. Di e placa, mi no sa nada.

YR

-  Bo kier agrega algo acerca?

JU

-  No, esey ta tur.