Tramite ta sigui pa e grupo naufraga bolbe Aruba diamars atardi

CARTAGENA – Tramitenan ainda ta andando pa trece e tripulacion di La Rumbera bek Aruba diamars awor. Mientrastanto fuentenan diplomatico ta confirma na NoticiaCla.com cu for di mainta, e grupo di 9 persona ta na Cartagena caba. Motibo cu mester a traslada nan pa eynan, ta debi cu nan mester a pasa e ‘tramitenan migratorio’ pa drenta Colombia ‘oficialmente’. For di eynan, ta buscando e forma mas lihe pa nan yega Aruba. E consul honorario di Cartagena Mauricio Villegas mientrastanto a compromete su mes di atende cu e asunto eynan. A ofrece e grupo estadia, cuminda etc., mientras cu nan ta den e base naval ARC “Bolivar” na Cartagena. Aki ta unda cu e coordinacion ta tumando lugar pa nan ‘repatriacion pa Aruba'.

TRAMITE DIPLOMATICO

NoticiaCla.com a compronde cu durante e odisea, Directie Buitenlandse Betrekking a traha duro pa facilita e contactonan internacional, acceso na espacio maritimo y aereo y tambe atende cu embahadanan di Reino na Venezuela y Colombia, pa medio di e consulnan general di Venezuela y Colombia na Aruba y e ministerio di relacionnan exterior na Den Haag.

E RESCATE

E detayenan di e rescate diadomingo mientrastanto, poco poco ta saliendo na cla, y ta mustra cu ta un otro version di loke a wordo duna oficialmente, esta cu nan mes (e grupo) a ‘rescata’ nan mes, y no cu un of otro instancia a yega na nan pa rescatanan. Pero esey no ta un problema awor. Segun e informacion di e propio personanan di e boto, nan a wordo haya ora cu nan tabata cana busca hende, ora cu un auto di armada nacional a para nan. E ‘Hulandes’ y e ‘Colombiano’ a bula na awa for di e boto prome, landa bin tera y cuminsa busca hende. Ta e ora ey nan a haya e oficialnan. Ora cu a bay bek pa e 7 otro personanan, a haya nan cu e tribu Wayuú, cu tabata encarga cu nan. A traslada nan pa e stacion di warda costa di Punta Espada, unda cu nan a haya cuminda y atencion medico, y na unda nan a warda nan traslado, te cu 6'or di awe mainta tempran pa Cartagena. Informacion cu medionan Venezolano ta raportando, pero cu no por a keda confirma, ta cu mirando cu e boto a keda den teritorio di e tribu Wayuú, a duna nan 3 dia pa drecha esaki, sino nan lo perde e boto. E informacion ta bisa cu como tal, a opta pa 2 di e personanan di Aruba keda cu e tribu, pa regla e asunto. Con esaki lo tin cu tuma lugar no ta conoci.

BIAHE PA ARUBA

Manera cu NoticiaCla.com a raporta for di diadomingo, e dia pa regreso di e grupo di 9, ta poni pa diamars (mayan), pero e forma ainda no ta cla. E problema, segun cu NoticiaCla.com tin entendi y confirma, ta cu no tin suficiente cupo pa e grupo riba avion comercial. Gobierno a compromete cu nan lo carga e gastonan pa e traslado pa Aruba, pero awor ta buscando e forma mas lihe pa yega. Opcion tabata Cartagena-Bogota-Aruba, pero no tin lugar. A purba tambe Cartagena-Panama-Aruba cu Copa, y actualmente ariba esaki nan ta trahando. Ño ta descarta cu tin e posibilidad pa charter un avion priva pa bai busca nan, ya cu no kier pa e grupo aki keda mas largo cu mester, mirando e odisea cu nan a pasa aden. Mas anochi of  mayan mainta, lo tin confirmacion di e ora di e yegada y tambe ki ruta e grupo di personanan aki a tuma. Un cos ta resalta, ta cu nan ta trankil, por comunica cu otro y ta den basta bon salud. FOTO Cortesia di EL UNIVERSAL (VENEZUELA)