Arubiana Sarah-Quita Offringa campeon mundial 2015 Slalom

NOUMEA - Pa di dos biaha, nos orguyo arubiano Sarah-Quita Offringa (Starboard / NeilPryde / Mystic / Maui Ultra Fins), a bira e campeon mundial di Slalom damas di PWA (Professional Windsurfers Association). E la sigura esaki diasabra ultimo durante un di e ultimo caredanan mundial te na Caledonia Frances, na Noumea. Matematicamente tabata imposibel diasabra pa e perde e titulo aki, mirando cuanto punto el a acumula pa e ranking mundial. Su ultimo careda tabata parse cu e lo a keda afo di e premionan, ora cu el a faya dos birada (gybe) na e prome y di tres bouy. Despues di e di tres bouy, Offringa a haya su mes den e di casi ultimo lugar, pero di un forma of otro, a bringa bek y reclama posicion number 4 y finalmente caba na di 3 lugar, cu a pone gana e di dos premio di e caredanan di Noumea. Y no mester kita afo, cu den e ramo di freestyle, e tin 8 titulo mundial caba. Pabien na Sarah-Quita pa su logronan y asina ta hiba Aruba su nomber na halto.