Minister Oduber: Asunto di visa pa turista tin nos atencion

ORANJESTAD  — 'E asunto di VISA pa turistanan cu propiedad na Aruba y of estadia mas largo tin tur atencion di e departamentonan concerni" ta reacciona diamars mainta di minister di turismo Otmar Oduber na NoticiaCla. Segun Oduber na mei ultimo a manda un comunicado pa tur aerolinea y partnernan (Travel Agents, Wholesalers, Hotels y otronan) den industria, aclareando e asunto aki(lesa e carta aki). "Na e momentonan aki DBB tambe ta bezig ta follow up cu IATA y otro partnernan pa sigura cu no tin confusion mas" e mandatario a sigui bisa.

Tabata dialuna, actuando riba un informacion di periodista Dilma Arends, NoticiaCla a cuminsa raporta riba e asunto cu ta un problema di interpretacion di regla y documentacion. Esaki tabata creando problema pa turistanan cu ta bin Aruba pa hopi mas cu 30 dia. E confusion ta entre e grupo di turista cu ta bin Aruba menos cu 30 dia y esnan cu ta bin mas di 30 dia. Y pa completa e obra, e falta di comunicacion entre e instancia internacional di aviacion IATA y su sistema TIMATIC (un sistema cu e ta alerta tur aerolinea kico e proceduranan ta pa drenta un pais (lesa e procedura aki) y e aerolineanan a pone cu turistanan cu si ta documenta, ta wordo perhudica. Recientemente un turista a haya su mes den un situacion asina. Esey a pone cu e la perde su vacacion completo ora cu un empleado di un aerolinea, siguiendo, -segun e trahado-, e reglanan di IATA, a prohibi e turista di continua cu su vacacion pa Aruba. Un asunto cu a haya atencion te den un noticiero di e canal di television di e ciudad ey.