Rij largo na tanto WEB como oficina di impuesto awe mainta

ORANJESTAD - Awe mainta a lanta (manera por a spera) hopi hopi druk na tanto oficina di impuesto y e oficina principal di WEB. Motibo ta cu pa ambos, tin deadline pa paga recibonan y of entrega aangifte di belasting. Awe mainta e situacion na WEB segun vocero di WEB, Asja Dongen, tabata hopi ocupa, pero 'bou di control'. "Tin fila largo pero nos ta prepara pa esey" Dongen a bisa. Potret awe mainta na WEB a mustra cu enberdad e lugar tabata completamente yen, pero cu WEB a percura pa facilita tent pa esnan cu mester warda pafo, por tin caminda pa sosega bou di solo. 

BELASTINGKANTOOR

Na belastingkantoor, e deadline pa entrega aangifte di inkomstenbelasting 2014 ta vence mayan diamars, y awe tabatin fila largo, di hende pa drenta. Aki si no tabatin tent pa acomoda hendenan cu mester a para den solo. Tin te mayan pa sea haci e entrega, of pidi pa un extencion. E vocero di e oficina di belasting no tabata alcansabel awe mainta pa mas detayes.