A haci hopi trabou pa a logra localisa y rescata esnan di La Rumbera

ORANJESTAD – Cu informacion di e rescate di e 9 tripulantenan di e boto La Rumbera, a bin un fin na un odisea cu a tene practicamente henter Aruba den su gara durante 72 ora. Un prome minister visiblemente contento y alivia, a expresa gratitud na tur esnan cu a coopera, cu a pone cu e odisea a termina na un forma positivo. Hopi persona tabata envolvi den e ultimo 72 hora, unda cu tabatin intercambio di conocemento, diplomacia y tactica pa por a logra rescata e 9 personanan awe. Durante un conferencia di prensa di ultimo ora diadomingo atardi, a splica den detayes kico tur a sosode pa por a localisa esnan perdi riba e boto y pa finalmente tin un desenlace positivo. 

INTENTO GRANDI PA LOCALISA E BOTO

A mustra cu ora cu a bira conoci cu e boto tabata den e area di e peninsula di Guajira, na Punta Espada, hasta e comunidad indigena tabata envolvi pa yuda busca si mira algo. “Di parti di kustwacht, tur trabou a wordo haci pa por identifica e boto” Eman a bisa. A mira e importancia di kustwacht, y e forma con el a opera den e ultimo dianan aki. “Desde e prome momentonan, a haci un trabou hopi hopi grandi pa saca botonan grandi riba lama. Friesland a wordo saca pa ta den e cercania, mientras cu Panter tabata cla pa sali si tabata necesario. 

CRITICA RIBA AYUDO DI GOBIERNO

E critica inicial cu no tabatin asistencia di gobierno, no ta berdad aunke cu gobierno no ta bay drenta den discusion riba esaki aworaki. Segun Eman, for di diabierna merdia/atardi tabata trahando riba e asunto, aunke cu porta e famianan no tabata informa. E ta compronde e angustia di e famia, y no ta tuma nan na malo si tabatin pensamento cu gobierno lo a laga nan na caya. "Ta full comprendibel cu famianan ta den un tension grandi. Nos no ta sinti ningun remordimento of nada pa esey. Nos tur den nan lugar " Eman a bisa. 

DIPLOMACIA A FUNCIONA

Un otro punto cu a resalta, ta e coneccionnan diplomatico cu a funciona hopi lihe, aunke Eman a splica NoticiaCla.com, cu den casonan asina, e relacionnan entre departamentonan manera kustwacht di Aruba y Venezuela y Colombia, por funciona tin biaha mas lihe, prome cu un gobierno cay aden. “Esfuerso grandi a wordo haci tambe pa director di gabinete di gobernador, y tambe director di departamento di relacionnan exterior. Tur esaki pa haya permiso necesario pa por a drenta espacio aereo pa drenta e areanan necesario di tanto Venezuela y Colombia. Inicialmente e comunicacion a exigi algun esfuerso adicional, pero na final tabatin e claridad y acceso di tur dos pais pa por a haci e trabou necesario”. Secretario di conseho di minister tabata e link entre e departamento. A reconoce sinembargo dos persona sigur crucial cu ta sr Kirindongo, y sr Paskel di kustwacht, cu a traha incansabel, pa guia y coordina tur esfuerso.

DESTINO A VENCE TECNOLOGIA

Un parti interesante cu Eman a menciona ta con a uza tur tecnologia, pa purba ubica e boto, su siguiente paso y rumbo, pero ta e mesun boto a busca su rumbo, cu ayudo di nos creador. “E tabatin su man den esaki, pasobra nos a uza hopi instrumento grandi, aparato, tecnologia y energia y ora, y toch e boto a yega netchi na e costa practicamente riba su mes. No por ta otro cu nos Señor a guia e rumbo di e desaroyo aki, pa e por a termina den e forma positivo aki” Eman a bisa.

SETAR SU AYUDO

Un ayudo sigur cu a bin bon, tabata e aporte di SETAR cu a habri e telefonnan pa a comberti e telefonnan 'prepaid', den 'post paid' y por a 'roam' pa por tabatin coneccion. Tambe a yuda ubica e lugar di e 'celsites' na Colombia, pa yuda 'pinpoint' e sitio exacto di e boto y e tripulantenan. A bay asina leu di identifica e compania “CLARO” di Colombia y despues a cuminsa e proceso pa haya autorisacion di e compania, pa tin dato priva, pa haci un estimacion di e distancia cu e boto mester tabata, pa por a comunica cu e 'celsite' di Colombia.

WELDER GUERRA Y CLIFFORD ROSA

Tanto Clifford Rosa y Welder Guerra tabata instrumental den e ayudo di e buskeda, unda cu Rosa su conocemento diplomatico y den e region Colombiano tabata instrumental pa alerta tur su hende - y conocinan pa yuda busca. Guerra su parti tabata, pa utilisa su canalnan di conocemento indigena, pa manda mensahe den e pueblonan, pa wak si nan ta mira algo. Prome cu e noticia a bira oficial cu a logra rescata e tripulantenan, tabatin e informacion di sr Rosa, cu indigenanan a haya e boto of mira e boto den e area, cu lo por tabata esun indica. Nan tabata instrumental pa por a yuda localisa e personanan perdi.