Joe Laveist Sport Park ta habri atrobe pa publico

ORANJESTAD - Despues di lunanan di preparacion, canando paralelo cu trabounan di renobacion y construccion, diabierna a tuma luga apertura oficial di Joe Laveist Sport Park. Cu picheo di Minister Mike de Meza y bateo di Minister Alex Schwengle, a inicia e evento cu a conta cu tribunanan completamente yen! E eventonan no tabata solamente riba diabierna, sino a sigui diasabra y diadomingo tambe.

CEREMONIA DI APERTURA

Diabierna dia 27 di november pa 6or di atardi ta tuma luga e apertura oficial di e facilidadnan, den cual a honra esunnan cu a sostene e sport park y grandinan den e mundo di deporte.

PROME WEGA DI BALA

E prome wega di baseball tabata entre Wild Cats di Corsou y e All Star Team di Aruba, mientras cu den Beach Volleyball tabatin 3 team masculino cu a midi forsa cu e atletanan di Aruba. Tambe tabatin algun pelea di Boxeo.

CAMBIONAN DEN E PARK

Joe Laveist Sport Park tin luznan nobo, tribuna y daknan di tribuna nobo, un score board moderno cu ta traha cu “remote control”, facilidadnan pa reporteronan transmiti wega, un veld completamente renoba y un “zandbak” pa haci e deportenan di beach, manera beach volleyball. E di tres fase di e renobacion y expansion di Joe Laveist Sport Park ta encera construccion di dos sala grandi pa “indoor sports facilities”, manera taekwondo, basketball, karate, boxeo, etc.