Eman a pospone biahe di Paris pa atende cu situacion di boto perdi

ORANJESTAD - Tabata obvio awe tardi cu prome minister di Aruba Mike Eman no a biaha mas pa Paris, manera tabata su intencion for di diasabra, esta ayera pa e conferencia COP21. Tur cos tabata cla pa hunto cu un delegacion, e sali rumbo Paris unda COP21, e reunion mas importante di e epoca aki ta tuma lugar, unda ta defini agenda 2030 pa loke ta cambio di clima y su efectonan pa islanan SIDS. Eman a wordo invita un biaha mas, door di Reino Hulandes, pa ta presente como orador den algun discurso, tambe como panelista y pa dirigi algun bilateral, durante e siman sumamente importante, na Paris, e ciudad di luz. Pero, ora cu e prome mandatario a keda informa di e destino di 10 persona perdi riba lama saliendo di Aruba pa Venezuela, el a cambia su biahe mesora. El a sigui e desaroyonan di buskeda di cerca, den convivencia cu e famianan, cu tabata bibando un insiguridad penoso mientras nan sernan keri ta den un odisea riba lama. Diadomingo den oranan di atardi a logra haya esnan perdi riba lama. Un alivio grandi a domina e sentimentonan na Aruba.

DELEGACION DI ARUBA NA PARIS

Mientrastanto parti di e delegacion a yega Paris caba. Minister di infrastructura Sevinger ta reemplazando Premier Eman den e prome reunion, cu ya caba a tuma lugar den presencia di Prins di Monacco, President di Carbon War Room Figueres y representantenan di SIDS (Small Island Developing States).