AZV ta urgi tur hende homber pa haci chekeo di salud

ORANJESTAD - Cifranan di AZV ta indica cu hende homber no ta gusta bay dokter y durante di Luna di Diabetes, AZV ta probecha di inclui informacion tocante di e importancia di un bishita di dokter y chekeo medico. Joost van de Kamp, relacionista publico di e instancia aki y miembro di Plataforma Promocion di Salud, ta splica cu ta sumamente importante pa e hende homber tambe haci un chekeo di sucu, entre otro, y haci nan screening di prostaat.

IMPORTANCIA DI CHEKEO

Van de Kamp ta subraya e importancia di un chekeo di salud pa tur persona, y particularmente nan chekeo di sucu, teniendo na cuenta cu diabetes ta un enfermedad cu por afecta bo calidad di bida si e no ta bon controla.

CASO DI TUR ENFERMEDAD

Den caso di tur enfermedad, sea ta algo cronico of ta un malesa pa cual tin un cura, ta importante pa haya un diagnostico tempran, pa asina preveni cu e malesa ta haya un chens di bira pio of causa daño permanente na un of mas organo.

8000 DIABETICO REGISTRA

AZV ta duna di conoce cu na Aruba tin 8.000 persona cu ta uzando remedi pa diabetes. No ta kita afo cu tin un grupo cu no a haya un diagnosis ainda of nan a haya un diagnosis of un resultado di test cu ta falta un bon “follow up”, pero como cu nan no ta sinti malo esaki nunca a wordo haci. Indicacion di International Diabetes Federation ta cu e grupo aki ta mes grandi cu e cantidad di hende cu si ta haya tratamento.

FUNCIONAMENTO DI PLATAFORMA PROMOCION SALUD

Joost van de Kamp ta splica cu Plataforma Promocion di Salud ta trahando hunto, pa promove e diferente evento y actividadnan pa cu Luna di Diabetes y ta conseha tur hende pa haci un chekeo gratis di sucu na e Bus di Salud ora e ta den bo vecindario of un di e otro puntonan di chekeo. Check con bo situacion ta, ta importante pa abo ta na haltura di bo estado di salud y haya e tratamento adecua pa controla bo diabetes, Joost van de Kamp ta comenta. Un otro punto esencial di e tratamento di diabetes ta, cu dia aden dia afo, e miembronan di Plataforma Promocion di Salud, ta bay wak con cos toch ta bai malo cu e pashent, cu ta haya su pildernan, e ta tuma nan, pero no ta adapta su forma di biba. E ta di suma importancia, pa un diabetico provee su curpa cu e combinacion di tratamento cu remedi, movecion y nutricion adecua. E pilder so no ta tur cos. Tuma pilder segun receta y no salta di tum’e ta keda recomenda.

PROGRESO DI ENFERMEDAD

Un factor cu ta rekeri extra atencion y tur ora ta papia di dje ta e progreso di e enfermedad cu ta acelera ora cu e pashent no ta combina remedi, nutricion y movecion; di pilder e pashent por bay pa insulina y mas e enfermedad progresa, e pashent lo haya mas complicacion e.o fayo di riñon cu mester di bay riba dialisis tambe.

TRATAMENTO TA COSTA AZV 3,9 MIYON

E tratamento di e 8.000 diabeticonan registra ta costa na remedi 3,9 miyon florin pa aña y, segun AZV, cada florin cu gasta pa cuida y controla diabetes ta bon. Pero, na mes momento AZV ta urgi pashentnan pa haci uzo di servicionan cu ta brinda guia di nutricion, movecion y cuido general, pa asina nan mantene e enfermedad bou control y evita cu tur e placa cu nan mes a inverti, pa medio di nan prima, no ta un gasto envano.

HOMBERNAN HACI CHEKEO

Joost Van de Kamp ta recorda specificamente hendenan homber, pa bay haci nan chekeonan cu mas frecuencia, paso mas trempan cu haya un diagnosis, mas trempan por cuminsa cu tratamento cu resultado exitoso.