Barco den problema cu agencia a bati alarma pa secuestro falso

ORANJESTAD - Un melding di secuestro di un barco di carga den awanan teritorial di Aruba a percura pa activa autoridadnan hudicial y maritimo riba nos isla diadomingo marduga. Na final a resulta cu e caso no tabata un secuestro, sino mas bien un diferencia di opinion entre doño di e barco y e tripulantenan.

MELDING

Pa 3:20 am, capitan di e barco "Fenix" nabegando bou bandera di Togo, situa mas o menos 4 miya zuid di Barcadera, a solicita ayudo for di Kust station pasobra su tripulantenan a secuestr'e.

ACTIVA AUTORIDAD COMPETENTE

Como cu algo semehante no ta pasa na Aruba, mesora a activa autoridadnan competente, pa bay den accion. Den marduga a reuni Directie Scheepvaart, Cuerpo Policial Aruba y Havenmeester. Separa di e instancianan menciona, tambe a reuni cu Alto Comisario di polis, Team di Aresto di polis, Warda Costa di Caribe Hulandes y Polisnan Maritimo. A pone Fiscal di Ministerio Publico na altura di e situacion y a inform'e di locual lo sosode.

CUTTER PANTER

E cutter Panter di Warda Costa di Caribe Hulandes a pasa den vecindario y a saca diferente potret pa asina facilita e grupo na tera, pa por traha un bon plan con y unda pa aborda e barco. Yegando e barco, polisnan a haya contacto via Marine Radio cu e barco. E persona abordo di e barco cu a papia via radio, a identifica su mes como e capitan. Ey polisnan a inform'e cu lo aborda su barco pa un control.

TEAM DI ARESTO

Cu tur e departamentonan envolvi, haciendo uzo di e Team di Aresto di Polis, a bay cu varios boto di polis y Warda Costa pa por a aborda e barco y den un record di tempo a controla henter e situacion, a wanta e tripulacion hunto, pa asina por a haci un control debido den henter e barco. Na tur polisnan a conta 11 miembro di tripulacion, di cual 9 ta di nacionalidad Dominicano, 1 Argentino y 1 di Nicaragua.

DECLARACION DI CAPITAN

E capitan a declara na polisnan cu dia 16 di november nan a sali for di Republica Dominicano direccion Aruba. E peticion di e compania, doño di e barco, tabata pa nan a nabega y pa staciona den awanan teritorial di Aruba, sperando nan siguiente trabou. Dos dia despues, esta dia 18 di november, ya nan a acerca awanan teritorial di Aruba, pero a opta pa keda afo. Diasabra 28 di november, nan a drenta awa teritorial di Aruba y a pidi nan agencia local, esta e compania Wevco, pa atende algun asunto pa nan, pero a haya di compronde, cu Wevco no ta nan agencia mas y no sa kico lo sosode mas cu nan tampoco. Mirando e circumstancianan aki, e tension abordo a bira di tal forma cu e tripulantenan no tabata mucho contento mas cu e capitan, pasobra e no por a brinda nan siguransa di kico lo sosode cu nan awor.

SECUESTRO FALSO

Polis a atende cu e capitan riba e hecho cu ela meld, cu e barco ta secuestra, locual ta resulta cu no ta berdad. El a splica cu como cu e compania, doño di e barco, no ta dunando nan oido, el a sinti 'como si fuera' cu e tabata secuestra.

SISTEMA AIS NO TA FUNCIONA

Ta bini acerca cu e sistema AIS di e barco no ta funcionando, pa mustra exactamente unda e ta situa, etc. E capitan anterior a informa esun existente, pa e tene masha cuidao pasobra tin iregularidad tumando luga cu e barco, manera bay 'fuel' ilegalmente na Venezuela pa despues drenta awa teritorial di Aruba, pa haci 'como si fuera' cu nos ta nan ultimo destinacion.

SOLUCION SATISFACTORIO

Buscando un solucion satisfactorio pa tur partido envolvi, polis a drenta den contacto cu e compania local Wevco, cu mesora a mustra interes pa representa e barco atrobe, pero cu mester pag'e adelanta. Mirando cu ta diadomingo, a acorda cu asina siman habri lo paga Wevco, pa por regla pa e capitan por bin tera pa regresa Republica Dominicana y pa manda un otro capitan abordo, cu lo mester hiba e barco bek pa e mesun destinacion. Polis ta sinti cu, despues di a atende cu e capitan y e tripulacion, cu nan a mustra comprension y hasta a mustra satisfaccion pa e rol di intermediacion cu Polis di Aruba a hunga, buscando un solucion pa e barco, pa e capitan cu kier regresa su pais bek y pa e tripulantenan cu tabata den incertidumbre.