Bapor Hulandes Friesland na caminda pa e boto 'La Rumbera'

ORANJESTAD - E bapor patruyero militar Hulandes Zr. Ms Friesland ta na caminda pa e speedboat 'La Rumbera", mientras cu tin un helicopter yegando e area caba na La Guajira unda cu a ubica e boto cu tabata perdi. Manera NoticiaCla.com a informa un rato pasa caba, tur persona abordo ta ok, aunke cu nan ta hopi cansa y cu awa cu tabatin, ta cabando. For di e vocero di e famia, Uri Croes, NoticiaCla.com a confirma cu fuera di Friesland, tin 8 lancha di Venezuela na caminda, y for di Aruba mes di tambe varios yate. Ta spera cu pronto tur por ta bek na Aruba. Loke no ta cla ainda ta si enberdad tin 10 of 9 persona abordo. Prome informacion divulga pa famia diabierna anochi, tabata cu tin 10 persona abordo. Awe mainta e cantidad a cambia segun warda costa, y cu lo ta trata di 9 persona. Ora cu a puntra Uri Croes, e no tabata mucho sigur mas cuanto persona tabata abordo. Importante ta awor, cu nan tur ta na bida, den bon salud, y cu pronto nan por ta na Aruba atrobe. 

SANO Y SALVO

Manera informa caba, tur e personanan a bordo di e speedboat La Rumbera ta sano y salvo! Un rato pasa e confirmacion a drenta cerca NoticiaCla.com di representante di e famia Uri Croes. E capitan di e boto a tuma contacto cu un di su familiarnan y bisa cu nan tur ta bon, den e boto pero no sa nan ubicacion. "Nan ta dilanti un costa pero no sa cua" Croes a bisa. Pero informacion addicional cu e tin, ta bisa cu e celtower di La Guajira, a capta e señal. Pues mas probable ta costa di Colombia. E boto tabata perdi for di diahuebs anochi, y ta aworey a haya contacto cu nan. Mientrastanto prome cu esey, prome minister Mike Eman y colega de Meza a reuni personalmente cu personal di Warda Costa na Savaneta, pa pone nan mes na altura di e caso y wak kico tur por wordo haci pa e esnan perdi riba laman. 

E ODISEA  

Pa mas di 24 ora, tabatin 10 famia Arubiano y Venezolano den angustia, sin sa di nan sernan keri cu ta perdi riba laman entre Aruba y Venezuela. Den un intento di desesperacion pa ayudo, famianan a pidi pa autoridadnan local asisti, cual peticion a bin durante un conferencia di prensa di ultimo ora diabierna anochi na Varadero. “Nos ta considera esaki un calamidad, ora cu 10 persona ta perdi riba laman y 10 famia ta den susto, en espera di informacion”, e famianan a bisa durante e conferencia. Un biahe comun entre Aruba y Venezuela, rapidamente a converti den un pesadiya pa 10 famia e fin di siman aki.

DETAYE DI E CASO 

Despues di un dia di informacion conflictivo, manera kico e nomber di boto tabata, cantidad di personanan abordo y mas, e famia a bin dilanti y duna informacion cu ta importante pa por yuda localisa esnan perdi riba laman.

E BOTO

Pa loke ta e boto ‘La Rumbera’, ta trata di uno boto nobo di fiberglass, tipo cigarette of ‘go-fast’ cu dos motor grandi (225hp cada un), cu ta wanta 8 pa 10 persona. Tabatin suficiente material di seguridad abordo, y salbabida abordo segun e doño di e boto, Darick vd Bliek a sigura NoticiaCla.com awe nochi. Nan ta custumbra di haci biahanan pa Venezuela, (Las Piedras, Venezuela), y esaki tabata un di e tipo di biahanan ey. Algun a bay pa haci compras, y otronan tabatin cita medico. Un biahe regular di 1 ½ riba lama, cu no ta nada in comun. Loke a sosode sinembargo ta cu na caminda, dos motor a cay afo, y e problemanan a cuminsa.