Famianan di e 10 personanan perdi riba laman kier ayudo

ORANJESTAD – Pa mas di 24 ora, tin 10 famia arubiano y venezolano den angustia, sin sa di nan sernan keri cu ta perdi riba laman entre Aruba y Venezuela. Den un intento di desesperacion pa ayudo, famianan a pidi pa autoridadnan local asisti, cual peticion a bin durante un conferencia di prensa di ultimo ora diabierna anochi na Varadero. “Nos ta considera esaki un calamidad, ora cu 10 persona ta perdi riba laman y 10 famia ta den susto, en espera di informacion”, e famianan a bisa durante e conferencia. Un biahe comun entre Aruba y Venezuela, rapidamente a converti den un pesadiya pa 10 famia e fin di siman aki.

DETAYE DI E CASO

Despues di un dia di informacion conflictivo, manera kico e nomber di boto tabata, cantidad di personanan abordo y mas, e famia a bin dilanti y duna informacion cu ta importante pa por yuda localisa esnan perdi riba laman.

E BOTO

Pa loke ta e boto ‘La Rumbera’, ta trata di uno boto nobo di fiberglass, tipo cigarette of ‘go-fast’ cu dos motor grandi (225hp cada un), cu ta wanta 8 pa 10 persona. Tabatin suficiente material di seguridad abordo, y salbabida abordo segun e doño di e boto, Darick vd Bliek a sigura NoticiaCla.com awe nochi. Nan ta custumbra di haci biahanan pa Venezuela, (Las Piedras, Venezuela), y esaki tabata un di e tipo di biahanan ey. Algun a bay pa haci compras, y otronan tabatin cita medico. Un biahe regular di 1 ½ riba laman, cu no ta nada in comun. Loke a sosode sinembargo ta cu na caminda, dos motor a cay afo, y e problemanan a cuminsa.

E TRIPULACION

For di e famianan awe nochi, a compronde cu enberdad tin 10 persona abordo, di cual 1 ta e capitan. Di nacionalidad por bisa cu tin 8 arubiano, y 2 venezolano. Total tin 7 homber y 3 muher, entre cual tin e tripulante di mas chikito cu ta e mucha muher di 16 aña.

E MELDING

Tabata entre 9’or cu 10’or, ora e famianan a ricibi un whatsapp, cu nan tin problema di motor, cu e boto ta drief y pa bin busca nan. Esey ta e ultimo cu a tende di nan. For di e momento ey, a purba mobilisa autoridadnan pa yuda cu e buskeda. Localmente cos no a bay mucho bon, unda cu segun e famianan, no a haya ayudo ni di warda costa ni di polis. De hecho, ora cu e grupo a bolbe Aruba awe mainta, nan a haya nan mes mal sirbi na Barcadera, segun nan splicacion, ora cu autoridad a listra nan manera ta hendenan malo nan ta.

EKIPONAN DI RESCATE

Di otro banda, tabatin elogio pa instancianan di rescate cu si ta yudando, for di Aruba, Corsou, Venezuela, Merca y Colombia. Tur ta den un operacion pa wak con nan por logra haya algo. Pero te cu awor, nada positivo a bin si di banda di esnan riba laman. Indicacion cu tin, ta cu nan tur ta riba laman ainda den e boto, y cu e cellularnan ta ok ainda. Esey pasobra ora cu nan yama, e telefon no ta ‘muri’.

ABOGADO CHRIS LEJUEZ

Un di e famianan den angustia ta conocido abogado Chris Lejuez, cu a splica NoticiaCla.com, cu tata di su dos nietonan ta riba e boto y cu e kier pa tur cos bay bon. Su contactonan a yuda cu awor tanto Setar como Digicel a habri e telefonnan prepaid y pone nan bira post paid y cu posibilidad pa roam, pa asina por tin un tipo di contacto. Pero asina mes, no a logra haya ningun señal di nan.