WEB: Carta solamente pa clientenan cu debe habri pa varios luna

ORANJESTAD – Despues di e ultimo comunicado di WEB riba e situacion di pagadonan laat, esaki lo a crea mas confusion den comunidad. Como tal diabierna atardi, WEB a manda un otro comunicado pa clarifica un que otro. Den e comunicado nobo, nan ta splica cu 'no ta bai corta awa di tanto cliente, ni tampoco ta bai manda carta pa e cantidad di cliente cu a menciona den e comunicado'. Aki nan ta referi na e cifra di 12.000 cliente. Segun e comunicado, WEB si a nota cu den e ultimo lunanan e cantidad di cuenta habri of atrasa a aumenta cu 30% y kier avisa clientenan cu den e periodo benidero lo ricibi un carta pa recorda pa paga cuenta.

KEN TA HAYA CARTA DIASABRA?

" Unicamente clientenan cu tin debe habri na WEB pa varios luna ta ricibi un carta di advertencia. Ta hustamente pa no cera awa sin mas, clientenan cu cuenta atrasa ta haña un ultimo recordatorio via un carta mara na nan meter". Ademas nan ta mustra cu ningun momento tawata e intencion pa causa incertidumbre of malentendimento. "Ta pone enfasis riba e hecho cu clientenan cu varios luna di pago atrasa ta e promenan cu lo ricibi carta di advertencia na nan meter di awa". Segun WEB, clientenan cu no reacciona riba e carta di advertencia dentro di 2 dia di trabou ta core e riesgo cu ta corta suministro di awa entrante diaranson 2 di december proximo. P’esey ta urgi tur cliente concerni pa evita e inconveniencia y pa cancela nan debe na WEB Aruba. "Pa posibel pregunta por yama na WEB su Call Center na telefon 525-4200". Por ultimo WEB a pidi disculpa pa e confusion cu por a surgi for di e comunicado anterior.