Prome minister Marlin kier cancela eleccion parlamentario na St Maarten

PHILIPSBURG – Si ta pa actual prome minister di St Maarten, William Marlin, e eleccionnan parlamentario di 9 di februari no ta sigui. Marlin, durante su prome conferencia di prensa e siman aki, a declara cu e kier introduci reforma den e ley electoral. Un proceso cu por dura por lo menos un aña of mas. E gabinete ta entrega mas tarda awe of dialuna, un amienda riba e decision di 29 di october ultimo di e disolvimento di e parlamento cu a wordo tuma pa e gabinete anterior.

SIGUI GOBERNA

En caso gobernado Eugene Holiday firma e amienda, e eleccion ta keda cancela y Marlin por goberna cu un mayoria di 8 di 15 asiento te ora cu e reformanan ta un hecho. Segun Marlin, e decision di gabinete tin e sosten di coalicion, aunke cu parlamento no a firma riba esaki formalmente. Gabinete Gumbs a desolve parlamento despues cu esaki a entrega un mocion di desconfiansa dia 30 di september. Cu e decision ey Gumbs kier a castiga esnan cu a ‘bula cura’ cu a causa e caida di su gabinete.

“Si nos no adapta e leynan electoral, nos no ta resolve e problema di buladonan di cura” Marlin a bisa. “Si nos ta serio riba e topico aki, nos mester drecha e ley, y eleccion no ta e solucion”.

CONSEHO

Marlin a referi na un conseho di Ernst Hirsh Ballin, cu ta mustra cu e decision pa desolve parlamento, tabata robes. Pero otro specialistanan constitucional, manera Arjen van Rijn, Joop van den Berg y Tijn Kortmann, tin otro opinion.

Pa: Hilbert Haar di Caribisch Netwerk foto: Hilbert Haar.