Comercio di Aruba den gara di Black Friday local awe!

ORANJESTAD – Gran parti di comercio na Aruba a lanta diabierna cu e keintura di e asina yama ‘Black Friday’. Historicamente un custumber original Mericano, cu ta data for mas di 20 aña (of mas), unda cu un dia despues di dia di gracia (Thanksgiving), ta inicia e periodo di compra pa Pasco. Aki na Aruba e aña aki e fenomeno a surpasa tur expectativa unda cu mas negoshi cu nunca, a ‘participa’ den e ‘keintura’ aki. Y manera e potret riba portada ta mustra, e conocido negoshi di electronica SAMS, tabata popular cu un fila largo di hende awe mainta.

CONCEPTO DI BLACK FRIDAY

E concepto ta pues, cu un dia despues di dia di gracia, Thanksgiving, comercio Mericano ta pone prijsnan ridiculamente abou, pa atrae mas hopi hende posibel, ya for di oranan tempran di marduga. A marca esaki desde algun aña caba na Merca, como e dia mas ocupa comercialmente pa negoshi. Y manera indica caba, Aruba no a basila pa tambe probecha di e parti aki. Y den e caso aki, varios a opta den nan propio estilo, pa participa. Mientras cu normalmente e dia ta tipifica pa descuentonan barbaro, por a nota esnan mas ‘conservativo’, cu tabata ofrece ‘apenas’ 10 pa 15% di descuento, cu no necesariamente ta indicativo di un ‘black Friday’.