Landado Allyson Ponson a clasifica pa e Weganan Olimpico di Rio 2016

STO DOMINGO – E di cuater atleta Arubano a clasifica pa e Weganan Olimpico di Rio 2016. Tabata diahuebs anochi durante e competencia di XXXIII Torneo Internacional de Natacion Delfines del Naco na Sto Domingo, cu e atleta Arubano Allyson Ponson a logra landa e tempo increibel den e 50 meter estilo liber y asina bira e prome atleta Arubiano den e deporte di landamento cu ta logra un clasificacion oficial pa e Weganan Olimpico. Nunca antes un landado di Aruba a yega di clasifica pa un Weganan Olimpico. Den e 50m estilo liber Ally Ponson a landa un tempo di 25.89 locual ta un record nacional nobo pa Aruba. E alegria tabata inmenso cerca henter e delegacion di Aruba presente den e Compleho Acuatico del Centro Olimpico Pablo Duarte.

OTRO ATLETANAN CU TAMBE A CLASIFICA

Despues di e clasificacion di e atletanan di sailing Philipine van Aanholt, Nicole van den Velden y Thijs Visser pa e Weganan Olimpico di Rio de Janeiro 2016, awo ta e landado Allyson Ponson cu lo join e trio como un atleta mas di Aruba clasifica pa dicho weganan di otro aña.

UN NOVUM PA ARUBA

Segun representante di Comitee Olimpico Internacional, Nicole Hoevertz a bisa NoticiaCla.com awe mainta, ta prome biaha den historia deportivo, cu Aruba ta logra clasifica pa weganan olimpico. Den pasado a participa a base di invitacion, pero nunca cu nan a clasifica pa forma parti di e atletanan olimpico. Un pabien na atleta Allyson Ponson, coach Ismael Santiesteban, e federacion di AZB, e mayornan y Aruba completo.