A haya 6101 deposito cu por ta criadero di dengue na Paradera

ORANJESTAD - Den e area di Paradera e inspectornan di GKMB a bishita un total di 2342 cas y a constata un total di 6101 deposito (container) cual por ta criadero di e sangura Aedes aegypti. A deshaci di nan debidamente. Na Paradera a bin topa un total di 90 criadero activo di e sangura Aedes aegypti. Ta importante pa menciona cu e casnan cu GKMB no a haya habri, pa e doño di cas controla rond di su cas. Consehabel pa busca y elimina criadero di sangura, segun cu ta indica riba e foyeto cu GKMB ta parti durante e accion diadomingo awo.

CONTROL DIADOMINGO AWOR

GKMB kier a informa cu lo tin accion di control, diadomingo awor den e bario di Paradera. Esaki, en conexion y cu cooperacion di e proyecto di Milieustraat di Serlimar dilanti di Centro Deportivo Rooi Afo. GKMB ta conseha tur habitante di Paradera y bisindario pa haci uzo di e oportunidad aki, pa asina elimina obhetonan cu por contene awa y tambe bira criadero di sangura durante yobida. Paradera ta consisti di 4 zona, cual ta Shiribana, Ayo, Piedra Plat y Paradera mes. E criaderonan mas comun cu a topa na Paradera ta scoter bou di pochi di mata, bari y hemchi cu awa. Pa mas informacion por tuma contacto cu GKMB na telefon 585-3325.