Manada di cacho di caya a hera ataca polis controlando auto

ORANJESTAD – Mientras cu algun miembro di cuerpo policial tabata eherce nan trabou controlando trucknan transportando sushi, nan a haya nan mes cu un grupo di cacho brabo di caya. Cu asistencia di un entrenador di cacho cu tabata eybanda, a logra domina e cachonan y e polisnan por a haci nan trabou atrobe sin ningun problema. Mester bisa cu polis a multa basta truck y auto cu tabata core sin number di auto paga, of tabatin un of otro papelnan cu no tabata na ordo.

Bon Dia Aruba cu tabata presente, a compronde cu e control tabata uno na un sitio strategico y riba un dia strategico, ya cu hopi hende ta uza e dia y lugar ey pa deshaci di sushi. E polisnan tabata ubica na varios parti di e caminda cu ta dirigi pa dump na Parkietenbos. Pues bo no por a scapa di e polisnan atento e diasabra ey. Mientrastanto cu no ta conoci cuanto automobilista a wordo ‘raspa’, Bon Dia Aruba a compronde cu ta bastante hende a haya un ‘cayente’. E ta fungi como un alerta pa esnan cu ta transporta sushi, mester tin esaki bon mara y den un condicion corecto sino nan por haya nan mes mal sirbi. Ademas e ta un oportunidad pa controla e automobilista pa papelnan di auto.

Entrante awe, e prome mitar di aña mester ta paga y como tal polisnan lo ta mucho mas alerta pa e controla aki, Bon Dia Aruba por a compronde.

Pa loke ta e parti di cacho, Bon Dia Aruba a nota cu tabatin un manada di cacho circulando pa basta rato, y dado momento ora cu un automobilista a wordo para, e cachonan a reacciona riba tanto e polis como e automobilista, pa cual e polis a haya su mes den un situacion fastioso y peligroso. Pero cu ayudo di e persona menciona, e cachonan a wordo domina y e polis por a sigui cu nan bon trabou e mainta ey.