Tata cu a mata yiu di 4 luna, cu castigo di 8 aña di prison

ORANJESTAD – Huez awe mainta a sentencia e tata cu a mata su baby di 4 luna, na 8 aña di prison. E tata, e homber di inicial G.B., a nenga semper y a purba tira culpa riba un di e otro yiunan. Fiscal den e caso aki a pidi castigo di 5 aña, pero huez a haya cu e merece mas castigo, y como tal a aumenta e castigo. Ademas e tabatin algun palabra fuerte pa e tata. 

E CASO

Durante e caso dia 5 di november ultimo, semper e tata a nenga culpabilidad y a purba tira culpa riba un di e otro yiunan. “Pero Nederlands Forensisch Instituut(NFI) a determina cu e lesionnan di e baby por a wordo solamente causa pa (forza di)  un homber”, vocero di ministerio publico Ann Angela a confirma awe mainta pa NoticiaCla.com. Durante e caso, a mustra cu e baby tabatin lesionnan bieu y fresco. Aki tambe a sali na cla cu e homber tabata maltrata e baby teriblemente te cu Dios a bisa ta basta. E tempo cu e caso di maltrato mes a tuma lugar, tabata na januari di 2013. E tata dado momento   a trece su baby hospital pasobra 'e baby no tabata duna señal di bida y 'tabata friew'. Aki a lanta sospecho cu e baby lo no a muri un morto natural, mirando e golpinan cu e  tabatin riba su curpa. 

INVESTIGACION

Investigacion (cu a keda presenta durante e caso)  a mustra cu patologo tambe a constata marca di sla di mokete fuerte na barica di e baby y cu e tabata parce mokete di un homber. Durante e tratamento di e caso, huez a mustra cu por tin dos sospechoso, esta e tata y e otro yiu, inicial I, cu ta autista. Pero segun investigacion haci, dificilmente e yiu por a mata su ruman, mirando e forza cu cual esaki a sosode. Den corte, a mustra cu e unico forma cu e ruman por a mata e baby, ta si e la bula riba dje, locual no tin prueba di dje. Mirando e resultado di e caso y e defensa hiba, huez a hisa e castigo pidi di 5 aña cu 3 aña mas y a sentencia e homber G.B. na 8 aña di prison.