“Vintage Vixen”, moda pa un causa sostenibel!

ORANJESTAD - Vintage Vixen (VV) ta un “online platform” y “pop-up shop” pa moda bunita cu ta “vintage” y segunda mano. Funda pa entrepreneur nan local Lara Kuiperi y Lavina Khemlani, VV su meta ta pa stimula moda sostenibel na Aruba pa medio di trece e placer di “cumpra calidad…y spaar” pa nos isla!

INTRODUCCION DI VINTAGE VIXEN

Despues di a keda introduci na juni di e aña aki, e concepto a haya hopi bon acogida y awor VV ta preparando pa su di dos evento pop-up, e Vintage Christmas Bazaar! Un coleccion amplio di articulonan vintage y segunda mano lo ser bendi den e interior di inspiracion baroco di e Restaurant Carpe Diem dilanti Renaissance Hotel. Participantenan invita pa e anochi aki lo ta e renombra Studio Italia, Vintage Queen Tropika Vintage, funky Alt+Shop y styling queens SwesStyle y The Fashionably Late cu lo presenta e mihor consehonan pa estilo di moda. Ademas, como cu Vintage Vixen tambe ta desea di crea un comunidad sostenibel di consumidornan, lo tin un auction silencioso pa un caridad special.

EVENTO DIASABRA

Pues bishita Carpe Diem restaurant riba diasabra november 28 proximo, di 6 pm te 11 pm, pa un anochi di moda y placer! Shop y spaar na bo antoho gozando di e ambiente fabuloso di Carpe Diem, e sunset, e musica y e menu special!

E FILOSOFIA DI VINTAGE VIXEN

Hopi biaha, impulsivamente nos ta cumpra algo nobo y bisti esaki un biaha so, y despues ward’e patras den cashi unda cu e ta keda varios aña te ora cu e daña of cu e no ta pas mas. Lastimamente e pañanan aki ta bay tira afor despues, mientras cu otro persona por a haci bon uso di dje.

SOLUCION PA DAÑO AMBIENTAL

Ta tempo pa un solucion pa e daño ambiental cu moda no-sostenibel ta causa tanto na e paisnan producente y e paisnan consumidor. Pa soluciona e reto aki na Aruba, nos a lansa Vintage Vixen, un “tienda” online cu ta presenta pop-up events tambe, y na unda fashionistanan por bende y cambia articulonan di moda y acesorionan segunda mano vintage y moderno. Mayoria di nos a yega di bisti un paña segunda mano tempo nos tabata mucha, of a fia un articulo di un amigo tempo di teenager, of a cumpra un articulo bunita y original vintage durante un biahe den exterior.

KICO VINTAGE VIXEN TA

E Vintage Vixen ta tribi di ta creativo y inovativo, y ta up-cycle, recycle, cambia y bende su articulonan di moda activamente. Promoviendo consumerismo consciente, nos ta yuda disminui moda “disposable”, nos ta crea conciencia encuanto aspectonan menos positivo di e industria di moda, y nos ta siña aprecia e balor di loke nos tin. Pero mas cu tur cos nos ta desea di crea un plataforma pa duna, comparti y conecta nos comunidad local.

Con esaki ta traha? Hopi facil:

1. Join e group page www.facebook.com/groups/vintagevaruba/

2. Pone un portret di e articulo cu bo kier bende riba nos pagina, cu e prijs desea inclui.

3. Bende esaki! Clientenan por contact cu e comprador directamente sin gasto.

Vintage Vixen tambe ta ofrece un servicio anonimo na esnan cu ta prefera di shop y bende den priva. Pa un suma di servicio chikito, VV ta bende bo articulonan y ta managa e transaccion completamente pa bo. Pa mas informacion, contact nos na (+297)5657808, of riba social media: facebook.com/vintagevaruba y/of riba Instagram: @vintagevixenaruba