Aruparking no tin culpa di a ‘klem’ auto di alto comisario

ORANJESTAD – Aruparking no tin culpa cu su personal a klem e auto di e alto comisario di polis Dolfi Richardson e siman aki. Por lo menos asina e compania ta purba splica pa medio di un comunicado awe. Segun e compania ta bisa “nos parkeerwachternan ta haciendo nan trabou debidamente, caminda ta controla tur auto nan sin ningun excepcion”. Y ta incumplimento di instancianan manera departamentonan di gobierno (bou di cual ta cay tambe polis), ta pone cu a sosode loke ta sosode, segun e comunicado.

REGISTRA NUMERNAN SPECIAL

Esaki pasobra Aruparking ta mustra cu varios ocasion a pidi Cuerpo Policial, numbernan di e autonan di por ehempel recherche, cuerpo special etc, cual ta auto nan cu ta uza A nummers riba nan, pa por registra nan y cada un lo ricibi un sticker evitando cu nan por wordo geklem. “Lamentablemente esaki no a pasa ainda treciendo cu ne, situacionnan indesea manera a sosode cu Alto Comisario Richardson”.

TA SIGUI LEY Y PROCEDURA

E compania ta sigui splica cu na momento cu un parkeerwachter yega na un zona y haya un auto cu A nummer riba dje para den un vak geel of un vak blanco cual no ta paga, nan ta bay over na e procedura di klem auto manera e ley ta prescribi. “ Ta di remarca cu parkeerwachters nan no tin ningun manera pa distingui auto si nan ta di polis, recherche of departamento similar cu ta eherciendo un trabao e momento ey, of si ta trata di un vehiculo particular” e comunicado ta finalisa bisando.