Sindicatonan ta menasa cu accion atrobe si toch elimina ley 1613x

ORANJESTAD – Mientras cu ultimo biaha cu sindicato den Union a sinta cu minister (di labor) a confirma cu no ta elimina e ley 1613x, tin rumor cu Paul Croes a bisa cu e intencion t'ey pa elimina esaki. “Of por lo menos haci cambio”. E mandatario lo a haci mencion di contracto di 8 luna, mientras cu e presidente di e sindicato FTA Hubert Dirksz ta sigura cu esey no ta na discusion.

GOBIERNO KIER ELIMINA 1613X TOCH

Dirksz sinembargo a informa durante un conferencia di prensa awe mainta, cu e tin informacion cu gobierno tin intencion di continua toch cu e eliminacion di e ley, y cu e dunado di trabou ta para pa esaki. “E ora no ta keda nos nada mas, cu nos ta continua cu nos lucha y nos lo mobilisa nos hendenan pa cualkier situacion, si nos mester bay den accion mas fuerte” Dirksz a bisa. A bisa tambe cu lo a laga tur trahado mas tanto posibel firma cu nan ta contra e intencion di gobierno. “Cualkier siguridad cu nos tin cu gobierno lo bay den e direccion eynan, e por ta sigur cu lo bin accion” Dirksz a bisa. A bisa tambe cu lo a participa esaki den un reunion cu tur sindicato y lo bisa nan esey tambe. E problema ta cu te cu awe, aunke cu e haci e peticion anteriormente, ainda no a haya e confirmacion por escrito, cu lo no elimina 1613x.

KICO SI SINDICATONAN TA DISPUESTO PA HACI

Segun Dirksz, loke el a compromete su mes cu ne, ta e situacion di desempleo cerca un grupo di trahado. Pa e grupo aki a pidi estudio, y kier sa e cifranan, e motibonan cu e gruponan menciona di 50 plusser, onderstanders y hobenan ta sin trabou, y basa riba esey, e sindicatonan ta duna nan aporte.