Odinsa a yama polis pa grupo di ciudadanonan protestando

ORANJESTAD – Awe mainta e representantenan di e compania Odinsa (responsabel pa construccion di Green Corridor) a yama polis pa e grupo di ciudadano cu tabata protesta contra e proyecto, pasobra nan tabata riba tereno priva. Aparentemente nan tabata riba e tereno unda cu trabounan tabata tuma lugar, locual e compania no a aprecia. A mustra cu no tin nada contra pa protesta, pero pa haci esaki riba caminda, unda cu trabounan no ta tumando lugar. Polis a mustra e ciudadanonan riba e peliger di protesta riba e tereno, y ademas cu ora cu trabounan ta tumando lugar, e no ta tereno publico mas. E ciudadanonan a tene nan mes na palabra y a para banda di caminda pa continua cu nan protesta, y polis a sigui su caminda.