Protesta contra destruccion di medio ambiente a sigui awe

ORANJESTAD – Awe mainta un biaha mas un grupo di persona a protesta na altura di e brug di Spaans lagoen contra destruccion di medio ambiente. Un di esnan protestando, Maureen Laaf-Ras a splica NoticiaCla.com cu e, ni e otronan presente, no ta representa ningun grupo specifico. Segun Laaf, tin yen di rosamento for di aeropuerto bin te pariba na rotonde di Pos Chiquito y ningun hende no ta actuando contra esaki. Y como tal e, y e grupo di otro persona, a sinti ‘e yama pa vocifera su mal contento.

FALTA DI LEY DI MEDIO AMBIENTE TA DEBILITA PROTESTA

Laaf ta mustra cu ainda no tin un ley pa proteha e medio ambiente. “Aworaki nos ta bisa cu boso a cross the bridge pasobra e mangrove tambe nan ta cuminsa benta abou. Nos ta na defensa di e medio ambiente, e flora y e fauna”. E accion a cuminsa un dia prome, y awe un biaha mas a sigui cu e protesta. Sinembargo a nota cu e sosten no ta grandi. A nota cu riba rednan social, tin hopi critica pero ta considera nan ‘leon di papel’. “Nan no ta bin”, Laaf ta bisa den forma desapunta. Como tal a organisa un otro protesta pa awe tardi, pa wak si mas hende por bin. “Pa esun cu kier, pa mayan nan no ta un mede plichtiger di e daño”. Laaf ta conciente si cu mucho nan lo no por logra. “Pa motibo cu e no ta hinca den ley. Ningun partido ni ningun gobierno a proteha esaki”. Antes sinembargo den siglo pasa tabatin ‘boswachters’ cu tabata cobra multa ora cu haci destruccion y susha lugar.

PARLAMENTARIO CROES TA SOSTENE E CAUSA

Parlamentario pa fraccion di partido MEP, Glenbert Croes tabata presente pa mustra su sosten na e causa di e ciudadanonan protestando. De hecho, a scohe e lugar tambe pa tene e conferencia di prensa semanal di e partido e mainta aki. Segun Croes, nan kier stress cu na e momento cu nos pais ta pasando den tanto problema, ta fiha riba un prioridad robez, refiriendo na e green corridor. “Mi ta akinan pa expresa solidaridad na e manifestantenan” Croes a sigura NoticiaCla.com. E intencion di e partido, segun Croes, tabata pa expresa nan pensamento riba henter e proyecto, esta e 4 baansweg, e green corridor. A mustra cu si logra e reapertura di e refineria, ta duna un chens pa e 4baansweg di tin derecho di existencia. “Pero na momento cu e pueblo ta pasa den necesidad, y (gobierno) ta pensa riba proyecto di caminda, e ora bo tin un prioridad robes” Croes a finalisa bisando.