Glenbert Croes: Señal pa posibel reapertura di refineria ta positivo

ORANJESTAD – Faltando un siman pa e deadline di CITGO vence pa mustra si tin chens pa reapertura di e refineria, señalnan di PDVSA ta mustra positivo. Por lo menos segun parlamentario pa partido MEP, Glenbert Croes. Asina parlamentario pa partido MEP Glenbert Croes a confia NoticiaCla.com awe mainta. Sinembargo e ta mustra si cu su optimismo ta controla. “ Mi kier ta ‘cautelosamente optimista ‘ pero e ta mustra sumamente positivo. Segun Croes, tin un motibo pa esaki tambe. PDSA tin un necesidad genuino pa tin operacion di e refineria pa nan por acelera e produccion di faha petrolifero di Orinoco.

CONECCION CU CITGO/PDVSA/LUONGO

Croes tin coneccion hopi yega cu e hefenan di PDVSA, entre nan sr Jesus Luongo cu ta na cabes di e operacion. Como tal e tin un bista bon di kico ta sosodiendo internamente. Segun Croes, e pais tin un necesidad strategico pa e deal sigui. “Venezuela pa e por sigui mantene financieramente economicamente su desaroyo, e mester genera mas entrada petrolero. Pa e por genera mas entrada petrolero, e produccion mester wordo acelera. Cu e refineria, esaki por sosode” Croes a sigui bisa. “E informacionnan cu ami ta ricibiendo ta cu e ta mustra sumamente positivo, esta e posibilidad cu e refineria ta habri” Croes a finalisa bisando.

DEADLINE CITGO

Manera ta conoci, fin di luna (otro siman) e prome ‘deadline’ ta vence pa Citgo, unda cu nan tin cu informa gobierno di nan interes y e resultado di e ‘due diligence’, y si tin necesidad mas investigacion. Si esey ta e caso, e fase dos ta cuminsa cu ta termina fin di december. Y si esey sigui, ta bin e fase final cu ta e fase unda cu ta cera posibel dealnan. No ta conoci si esey ta encera tambe negoshacion caba cu e doño di e refineria, esta Valero. Te awor, Valero mes ta hopi keto publicamente, y ta continuando tambe cu su proceso di desmantelacion, aunke di un nivel cu e no ta afecta cualkier intento di reapertura si esey bira un hecho.