Ultimo Diadomingo di Containers den Bario” na Rooi Afo, Paradera

PARADERA - Despues di e exitoso diadomingo ultimo na San Nicolas, Aruba Tourism Authority y Serlimar ta anuncia e ultimo edicion di e proyecto “Containers den Bario”. Pues diadomingo awor 29 di november, Paradera ta na turno. E sitio exacto lo ta e parkeerplaats di Centro Deportivo Rooi Afo. E horario lo ta di 8’or di mainta pa 2’or di atardi. Corda probecha awor y no warda te ultimo ora pa cuminsa cu e limpiesa mas grandi di aña!

MILIEUSTRAAT

Cu e generoso sosten di ATA, dicho proyecto un biaha mas ta wordo ehecuta dor di Serlimar den e concepto di un “milieustraat” of “caya di medio ambiente”. Lo ta bai tin opzichternan presente na tur momento, specialmente pa dirigi y asisti bo den esaki y nos ta conta cu e cooperacion di un y tur.

TIPS PA PREVENI DENGUE Y CHIKUNGUYA

Tips pa preveni Dengue y Chikunguya tambe na Milieustraat. Gele Koorts en Muskietenbestrijding tambe lo bai ta presente pa suministra informacion di prevencion di Dengue y Chikunguya na publico. Ta temporada di awacero atrobe pues elimina tur criadero, haci limpiesa na cas y den bario y ricibi bo tipnan valioso directamente di GKMB.

DUNA ARUBA E MIHO DI BO!

ATA sigur ta un instancia cu ta promove lo miho di nos isla y esaki definitivamente ta inclui pa duna Aruba e miho di bo y yuda mantene nos isla limpi! Cu e pensamento aki den mente, ATA ta sigui sostene Serlimar y e noble projecto Milieustraat pa asina ofrece Aruba un manera facil, gratis y responsabel pa deshaci di desperdicio di cas grandi (grofvuil) pa fin di aña. Dor di duna prome na comunidad y pone containers disponibel, lo motiva tur habitante pa (man)tene rond di nan cas limpi y asina contribui pa mantene e bario mes limpi. Pa mas informacion, comunica libremente na 5245080 of busca nos riba facebook.