Corte cu sentencia inovador pa Aruba pa compania telecom

ORANJESTAD – Den un caso di LAR entre gobierno y e compania local di telecomunicacion COMSEA, Corte Comun a duna e compania rason recientemente. E veredicto ta bin despues di un periodo largo legal entre e dos partidonan aki, cual veredicto, e abogado di e compania, -esta Geert Rep-, a splica NoticiaCla.com diamars, cu e ta considera como ‘un decision inovador’. E ta habri caminda pa e ciudadano of compania no keda perhudica pa motibo cu gobierno ‘no a of kier tuma’ un decision riba un peticion pa un of otro permiso.

BATAYA DI HOPI AÑA

Pa loke ta e caso aki mes, ta trata di un bataya di varios aña cu e compania tin cu gobierno, pa haya un permiso pa opera un cable landing station. E cable lo duna Aruba connection di internet pa exterior y lo por ofrece servicio di internet, data, content di cable TV etc., banda di Setar. E cable mes ta pasa den laman, entre paisnan, cu ta haci e coneccion posibel. Setar mes tin tal facilidad, pero tin monopolio riba esaki awor. For di 2008 e proceso aki ta andando y ainda e compania no por a keda cla cu gobierno. Cu e sentencia aki, e compania por sigui cu e proceso y Aruba lo por tin otro proveedor di telecommunication international.

PROCESO LEGAL DI LAR

E proceso cu e compania mester a pasa aden, no ta nobo. E ta haci un peticion na gobierno pa un permiso di operacion. Gobierno na su turno, tin 12 siman pa dicidi riba esaki. Sea e ta dicidi negativo of positivo den e periodo aki. Si e no logra tuma decision of ‘lubida’ di haci tal den e periodo ey (e periodo di hero) y e periodo vence, legalmente el a ‘rechasa e peticion’, aunke cu e no a informa e partido ‘oficialmente’ di esaki. Pesey e rechaso yama un ‘rechaso ficticio’. E tipo di rechaso ey ta un practica hopi comun serca gobierno segun e abogado. Ora cu esey sosode, e ciudadano of compania tin 8 siman di tempo pa entrega un obhecion contra e decision ey, ficticio of no. Esey ta bira otro ‘periodo di hero’. Si pa un of otro motibo, e ciudadano of compania no manda su obhecion den e periodo menciona, e no (taba) tin chens mas pa protesta y of entrega un peticion di nobo, aunke cu ta gobierno ta esun cu no a reacciona. Y segun e abogado, te cu awor, tabatin e impresion cu unabes cu esey sosode, cos a caba. Awor esey ta diferente. Awor tin mas caminda pa cana den un caso di LAR.

SENTENCIA

Den e sentencia di 20 di november ultimo, Corte a dicta cu,-contrario na pensamento di gobierno cu a kere cu den caso falta di obhecion no mester tuma un decision nobo-, gobierno mester dicidi atrobe toch. Esaki pasobra Corte ta determina cu e ley ta pa proteccion di e ciudadano/compania. Como tal ta considera esaki como uno inovador cu por tin hopi consecuencia pa Aruba.

MINISTERIO DI TELECOMUNICACION

Den e caso particular aki, ta trata e ministerio di telecomunicacion cu ta cay bou di minister Mike de Meza cu for di comienso a kita e permiso, y despues ora cu Comsea a bai corte, a nenga di duna e permiso y of a nenga di contesta of dicidi riba e dunamento di un permiso. Cu e sentencia aki, e compania por sigui cana su caminda pa formalisa e permiso inicia, riba cual awor gobierno ta obliga pa duna un contesta.