Un arubiano y 6 colombiano deteni pa traficacion di droga

ORANJESTAD - Polis a dal baho mundo di droga un sla bon duro, unda cu a detene no menos cu 7 persona sospechoso y tuma arma, droga, municion y boto den beslag. Tur esaki ta relaciona cu un investigacion grandi di droga andando pa bastante tempo caba. Tabata diadomingo ultimo cu un ekipo special di recherchenan a efectua varios detencion, banda di algun bishita na casnan unda ta sospecha cu tin transaccionnan di droga ta tuma luga. Cu esaki Cuerpo Policial Aruba ta bolbe dal baho mundo di droga un otro sla duro.

NOMBERNAN Y NACIONALIDAD DI SOSPECHOSONAN

E sospechoso envolvi den e caso aki, cu entretanto ta deteni y encarcela relaciona cu e investigacion penal andando ta e homber P.F. Hoyos-Gomez, naci na Colombia di 47 aña di edad, biba na Sero Patrishi. Tambe Polis a detene e homber C.D. Aguirre Henao, naci na Colombia di 30 aña di edad y biba na Paradijs. A detene tambe e homber A. Aguirre Henao, naci na Colombia di 23 aña di edad y biba na Rooi Afo. A detene e señora L. Cadena-Garcia, naci na Colombia di 27 aña di edad y biba na Rooi Afo. A detene un otro señora D.C. Narvaez-Espinoza, naci na Colombia di 24 aña di edad y biba na Paradijs. Tambe a detene e homber C.D. Cardena-Garcia, naci na Colombia di 26 aña di edad y biba na Pos Chikito. Den cuadro di e investigacion aki y den presencia di Hues Comisario y Fiscal di Ministerio Publico, Polisnan a bishita tres cas situa na Rooi Afo, na Sero Patrishi y na Hooiberg Kavel.

DROGA HAYA DURANTE INVESTIGACION

Durante e investigacion na e casnan, autoridadnan hudicial a topa cu un cantidad grandi di pakinan conteniendo Marihuana y Cocaina. Durante e investigacion na e cas situa na Hooiberg Kavel a haya hasta un arma di candela, un pistol cu dos peña yena cu bala cayente. Na e mesun cas, den baño a topa cu un saco di bruki cu yen di bala cayente uza den arma di candela. Husticia a tuma 3 auto y un boto estilo "Go Fast" den beslag na dicho cas, den cuadro di e investigacion andando.

DETENCION

Despues di a descubri e cantidad di droga, arma y otro articulonan sospecha pa ta parti di un organisacion criminal, a sigui investiga y a conduci na detencion di e homber W.C. Everon, naci na Aruba di 61 aña di edad y biba na Tanki Leendert. Cu su permiso, a haci un buskeda den su cas tambe, den cuadro di e mesun investigacion aki, den presencia di un Fiscal di Ministerio Publico. Cuerpo Policial Aruba ta convenci cu e detencionnan, e droganan y arma tuma den beslag, e autonan y e boto, sin duda ta demostra cu aki ta un grupo cu ta anda den baho mundo di droga, pa cual investigacion awor lo mester prueba nan participacion den e delitonan di cual ta sospecha nan di dje. No por descarta cu lo por tin mas detencion ainda den e mesun caso aki.