Propio trahadonan di Aruparking ta exigi lugar pa parkeer gratis

ORANJESTAD – No ta solamente trahadonan di negoshi ta exigiendo pa nan espacio di parkeer pornada, pero hasta e propio trahadonan di Aruparking. Pero ta trata un grupo chikito di e total di trahadonan, segun gerencia a splica NoticiaCla.com. Director di Aruparking, Teo Croes, awe mainta a confirma na NoticiaCla.com cu tin un problema eynan, pero pues ta cu un grupito y no tur manera cu a kere inicialmente. “Nos a ofrece nan alternativa” Croes a bisa. Ademas di e problema ey, a manda algun trahado cas recientemente debi na nan comportamento. Algo cu a keda cla caba tambe.

KEHO DI E TRAHADONAN

For di ayera tabata circula informacion riba rednan social, cu trahadonan di Aruparking tabata nenga di parkeer nan auto y paga pa esaki. “Nan kier parkeer gratis” tabata e gritonan cu tabata zona tambe entre otro na radio. E informacion tabata cu gerencia tabata kier pa e trahadonan paga 60 florin pa parkeer nan auto den centro di ciudad. Pero supuestamente lo no kier a tende di esey y lo a exigi cu nan, siendo trahadonan di Aruparking, mester por parkeer pornada. Gerencia (segun informacion ricibi) lo a ofrece nan e ora pa reduci e suma te na 30 florin. Pero aki tambe e trahadonan lo a rechasa e peticion ey.

BUSCANDO SOLUCION PA E PROBLEMA

Segun Croes a splica NoticiaCla.com awe mainta, cu e trahadonan nan kier luga pa para dilanti oficina y por nada .” Pero ta cu algun so e problema ta, y nos a ofrece nan alternativanan” Croes a sigui bisa. El a confirma tambe cu enberdad ta purbando pa yega na un areglo cu e suma di placa. “Pero e problema no ta e pago, sino e lugar alternativo” Croes a sigui bisa. “ Tin algun request di nan cu nos no por honra na e momento nan aki y cu nos ta bezig cu nan pa yega na algo. Pero esaki ta un grupo chikito” Croes a sigui bisa.

GRUPO DI TRAHADO GESCHORST

Pa loke ta e grupo di trahado di Aruparking cu a wordo geschorst, ta trata di un grupo cu a falta respet pa nan superior na mas cu un ocacion. Mientrastanto e grupo cu tabata geschorst, ta bek na trabou. No ta conoci con grandi e grupo di trahado aki ta.