Casinonan no ta contento cu gobierno pa aumenta drop tax

ORANJESTAD – Si gobierno sigui cu su plan di introduci e reformanan fiscal otro aña manera cu el a anuncia e.o. dialuna, esaki lo nifica un gasto extra pa casinonan na Aruba di algo mas di mey miyon florin pa aña. E ta traduci na casi 7 miyon pa tur e 13 casinonan cu tin na Aruba cu tin cu paga esaki extra pa aña. Segun fuentenan na nivel gerencial cu a pidi NoticiaCla.com pa keda anonimo, nan a splica cu p'esey e casinonan tin un problema cu e plan di gobierno pa aumenta e asina yama ‘drop tax’ cu 2% otro aña. Aworaki e tax cu nan tin cu paga anualmente ta 4%. E intencion di gobierno ta pa aumenta esaki cu 2% pa 6%. Algo cu tin e casinonan pues hopi preocupa.

HISTORIA DI DROP TAX

Segun cifras di Centraal Bureau Statistiek (CBS), e drop tax cu casinonan tabata paga gobierno na 2014 tabata 14 miyon florin total, cu ta un reduccion di por lo menos 6 miyon for di 2007 ora cu casinonan tabata paga 20 miyon pa aña. Menos nan gana, menos tin cu paga. Y ta mira claramente cu e entradanan a bin ta baha. E 2% extra ta nifica pa cada casino awor algo mas di mey miyon extra cu nan tin cu paga, dependiendo di e grandura di e casino y e drop cu cada casino ta haci. Pero en general, e sumanan menciona ta esnan cu ta ‘den wega’.

PROBLEMA CU CASH FLOW

Segun e fuentenan a splica NoticiaCla.com, esaki ta nifica un sla directo pa e cash flow di e casino. Como tal e ta nifica tambe cu no por conoce aumento den trahado, y mas pio ainda, un reduccion den personal. “E doño di trabou no ta bay carga esaki” e fuentenan a sigui bisa NoticiaCla.com.