Riu Palace a mustra kico un renovacion di 25 miyon ta nifica

ORANJESTAD – Den fin di siman, un grupo di prensa local por a experencia y mira cu wowo propio, kico 25 miyon dollar den renovacion na Riu Palace Hotel ta nifica. Despues cu e hotel a habri su porta na 2007, e hotel a cumpli e aña aki cu un renovacion cuantioso. Y awor e hotel tabata cla pa mustra kico tur esaki a inclui. Pa esnan cu conoce e hotel ‘anterior’, mester bisa cu e cambio tabata basta radical, di un look mas ‘conservador’ pa uno ‘totalmente moderno’, cu colornan mas briyante y actualisa. Loke no a cambia, tabata e amabilidad di e personal di hotel. For di momento di check in te na e servicio di cuminda, y asistencia ora di acomoda bo cu cualkier asunto.

ESTADIA

Prensa por a experencia tur esaki durante un bishita di un dia y anochi, unda cu a mustra algun camber, y e facilidadnan cu nan ta ofrece. E gerente regional Daniele Camponovo, hunto cu gerente di e hotel mes, Richard Velazco, hunto cu e gerente di benta Enrique Llinas tabata anfitrion di e bishita cortico.

IMPRESION

E impresion tabata claro. Un ambiente moderno, limpi e progresivo. Colornan diferente, briyante y si, atrobe, moderno. A nota cu den un tempo relativamente corto, a logra haci hopi cambio, sigur pa esnan cu ta frecuenta e hotel. Entre nan, a haci cambio den e lobby, piscina y añadi te hasta un teatro ‘chikito’ riba e teraza pafo. Aki aya, algun cambio chikito tambe pa duna hasta lo minimo, un toke special.

INTENCION DI HOTEL

E intencion segun Camponovo, tabata pa crea un area mas ‘limpi’, enbes di e impresion di ta ‘druk’. Y for di e bista inicial, e hotel a logra esaki tambe den gran forma. E ta un cambio basta drastico, di loke e hotel tabata. Un persona cu tabata gusta e estilo anterior, lo tin cu custumbra cu e cambio actual, specialmente cu e colornan y e forma contemporaneo cu e hotel a incorpora awor.

AMABILIDAD DI E PERSONAL

Loke sigur no a cambia, ta e amabilidad di e personal. De hecho, por a sinti un aumento den e calidad di servicio. Personal mucho mas atento cu antes, servicial y cu e sonrisa eterno riba nan cara. E amabilidad a resalta grandemente, y si, te hasta riba e cambionan structural cu e edificio a caba pasa aden.

MOMENTONAN TURBULENTO

Pa un hotel cu durante e ultimo aña, no a pasa den su miho momentonan operacional, (welga, problema structural, casonan legal y mas), e cambionan logra den e hotel, sigur no a demonstra esey e fin di siman aki. E personal a demostra cu nan ta determina pa haci e estadia di e bishitante, uno amabel, cortes y sigur, sinti bo na cas. Manera den cada bishita na e propiedad, e gerencia no a sconde cu nan tabatin momentonan dificil, pero manera cada compania, a mustra cu nan a sa di surpasa tur momento dificil, y awor ta briya cu un propiedad ‘renoba’, manera cu e cadena Spaño ta conoci p'e.