Protesta di 'candela' tabata contra medida di gobierno

ORANJESTAD - Un dia despues di e candela intencional dilanti e edificio di representacion di gobierno Hulandes na Aruba, VNO, e marcanan di e daño ta visibel. Un tapijt preto, resto di tire kima un anochi anterior. E borchi cu e number y nomber tambe no a scapa di e huma y cayente di e candela. E autor mes, Rocky Kelly, ta cera ainda pendiente su caso. Conoci pa a comete actonan similar den pasado, Kelly a mustra durante su 'acto' cu e ta haci esaki como protesta contra e medidanan recien anuncia di gobierno, di entre otro 7% di Algemene Bestedings Belasting (ABB) cu gobierno kier introduci. Kelly a keda deteni, y hiba warda di polis unda cu e lo mester a keda cera pa por lo menos un anochi. E daño ta conoci, e autor tambe. E castigo pa su acto ainda ta keda pendiente. 

INVESTIGACION 

Mientrastanto e resultado di e investigacion riba e candela anteriormente cendi pa Kelly (su auto), tirenan dilanti porta di parlamento, y e generator di DOW na augustus, no ta conoci ainda. Tur (incluyendo Kelly) autor a keda deteni segun investigacion a tuma lugar, y despues a haya nan respectivo libertad, pero te ainda ningun no a bin dilanti pa nan caso y no ta conoci awe mainta, ki dia e casonan aki lo tin cu bin dilanti.