Ex trahadonan di Tiara Air lo haya nan pago pendiente

ORANJESTAD – Ex trahadonan di Tiara Air lo haya nan placa pendiente completamente paga, mas lihe cu ta posibel. Por lo menos, asina cu nan mes ricibi pago atrasa di autoridad Venezolano . Esaki tabata e promesa haci pa e director propietario di e compania aereo Alejandro Muyale, diabierna ultimo. Manera NoticiaCla.com a raporta caba, e compania a haya luz berde pa continua nan operacion awor, despues cu mayoria di e creditornan a bay di acuerdo cu e plan di pago di e debenan pendiente. Loke no tabata cla, ta e situacion di e trahadonan retira. Esaki ta resolve tambe e disputa laboral cu tabatin y cu a pone cu e trahadonan aki, te cu siman pasa ainda, no tabata mucho cla.

PROXIMO PAGO

Segun e CEO, e pago lo sosode despues di e proximo pago cu e compania ricibi for di autoridad Venezolano, suheto na e hecho cu e autoridadnan di impuesto coopera. Dus e empleadonan lo haya nan pago, asina cu e pagonan keda haci pa e autoridadnan .

CLAIM DI TRAHADONAN

E ‘claim’ di e empleadonan ainda den servicio, ta wordo paga den dos pago igual, di e pagonan cu tin cu bin ainda di autoridad Venezolano. Nan tambe lo wordo paga asina cu e fondonan bira disponibel. Asina e CEO ta mustra cu ta haciendo tur intento pa cumpli cu pagonan atrasa di e compania.

WORST CASE SCENARIO

Si Tiara Air no a ricibi pago di autoridadnan Venezolano pa 1 di april 2016, e mes lo paga e claim di tur trahado, den 12 pago mensual, cuminsando dia 30 di april 2016. Pues den forma di un tipo di salario. Muyale a gradici tur e trahadonan pa nan sosten y a felicita nan cu e logro di diabierna ultimo.