SIMAR: Tempo pa gobierno, SKOA y scolnan cambia maneho a base di ley

ORANJESTAD - A yega tempo pa gobierno, SKOA y scolnan cambia nan maneho a base di ley. Asina directiva di sindicato di maestro na Aruba, SIMAR ta pensa. Segun su secretaria Maroeska Cornelie, recientemente directiva di SIMAR a yama un reunion cu maestronan di SKOA pa duna informacion tocante varios punto di atencion regardando e scolnan di SKOA. Lastimamente e reunion aki no tabata muchu bon bishita. Directiva di SIMAR ta lamenta esaki ya cu a constata cu hopi di e informacion treci dilanti, cual ta di suma importancia, no tabata na conocemento di esnan presente.

META DI REUNION

E meta di e reunion tabata ta pa informa maestronan di SKOA debidamente di e caso andando y di contenido di ley cu por trece cambionan grandi den e forma cu gobierno ta atende cu scolnan y empleadonan di SKOA.

FALTA DI TRANSPARENCIA

Segun e directiva, a resulta cu no tabata tin transparencia suficiente ya cu gran parti di e informacion y detayenan cu SIMAR a trece dilanti tabata desconoci pa esnan presente, incluso pa cabesantenan.

Loke a resalta tambe ta cu hopi maestro no tin e informacion corecto di e caso cu algun mayor a lanta contra SKOA, di posibel consecuencianan si cobra y/o obliga mayornan di paga “schoolgeld” y tambe di e detayenan di loke ley ta encera pa cu cubrimento di gastonan di scolnan.

CASO MAYOR CONTRA SKOA

E punto di mas importante cu SIMAR a trata ta e impacto grandi cu e caso cu mayornan a lanta contra SKOA a causa den su scolnan y di e cambio drastico cu lo mester tuma lugar den e maneho di gobierno pa cu SKOA su scolnan si maestronan di tal bira mas conciente di loke ley ta encera pa cu e derecho di scolnan di SKOA.

CAMBIO DRASTICO

Esnan presente tabata di acuerdo cu SIMAR cu un cambio drastico mester tuma lugar den e pensamento y e custumber cu a bira practicamente cultura di scolnan y personal pa percura pa cubri gastonan cu ta toca caha di Land Aruba.

“A bira tempo pa gobierno carga su responsabilidad segun ley y pa SKOA y dirigentenan di su scolnan bira mas conciente di loke ley ta prescribi, pa su scolnan y su personal por yega na e trato, sosten y material mescos cu scolnan publico”, e sindicato a finalisa bisando.