Palabra ‘peluca’ ta esun ganador di e prome ‘spelling bee’ nacional di Aruba

ORANJESTAD - Den un sala di Renaissance Convention Center completamente yen, diabierna ultimo un cantidad di 72 studiante di 10 diferente scol a participa den e prome Spelling Bee nacional, esta Shoco Sa Spel. "Un aspecto importante pa Enseñansa ta pa stimula siñamento pafo di e 4 murayanan di un klas. Siñamento y e gana y "fun" di siña mester existi na diferente manera y esaki ta e base con e proyecto Spelling Bee a nace", asina Minister Hooyboer-Winklaar a duna di conoce. E mandatario a splica cu for di aña pasa a bin cu e concepto di spelling bee pa Aruba, un concepto conoci rond di mundo.

GANADORNAN

Na final tabatin 4 ganado, un den cada idioma. Nan a bay cu premionan mayor y tur participante a ricibi un certificado di participacion. E ganado den idioma Spaño a resulta Marvin Rodriguez di St. Anna School. El a gana uzando e palabra: guapo. E ganado den idioma Hulandes tabata Nathaly Arends di Colegio Oro Ubao. El a gana cu e palabra: kapitein. E ganado den idioma Ingles a resulta Ragnieska Blanco di Colegio Oro Ubao, uzando e palabra: manner. E ganado absoluto den e idioma Papiamento tabata Kinchunson Ho di Colegio San Hose, kende a gana uzando e palabra: peluca.