No por warda feitenonderzoek pa sigui cu sala di operacion

ORANJESTAD - “No por warda pa e resultadonan di e feitenonderzoek pa sigui cu e proceso (di keda cla cu e plannan pa e sala di operacion nobo) como cu esaki lo stanca e proceso y e sala di operacion mester wordo incorpora den e plannan actual. Asina e mandatario di salud Alex Schwengle a declara e fin di siman aki. E ta un poco frustra cu e ta tumando largo, pero ta compronde e proceso si. Cu un feitenonderzoek pidi pa Parlamento andando di parti di hospital pa haya sa exactamente pakico no a incorpora e sala di operacion nobo den e plannan di renobacion y expansion di hospital, e proceso pa yega na e sala di operacion nobo ta sigui e curso cu e mester sigui.

COMBERTI SCHETS DEN PLAN Y PRESUPUESTO

Schwengle ta splica cu ora cu e “schets” a wordo comberti den plannan y un presupuesto definitivo e lo presenta esaki na Ministerraad y lo dialoga cu Parlamento tocante tur detaye. E mandatario ta agrega cu e ta un persona cu kier tur proceso cana mas lihe, pero debi na e nivel di calidad haltisimo y detayenan cu mester anda masha meticuloso cu nan, e proceso ta tumando un poco largo den su opinion. Sinembargo, despues cu el a pone mas atencion na con casonan di planning di proyectonan similar ta wordo maneha den exterior – na Hulanda y Merca, e sa cu e proceso por tuma entre seis pa 12 luna. Pues, e tempo cu ta tumando pa haci e planning y traha e presupuesto na Aruba ta masha normal.

RISICO DI SEGURO

Aruba no por sigui cu e sala di operacion actual, pasobra tin risico pa e compania di seguro stop e seguro di hospital. Minister Schwengle ta añadi cu no ta drama e ta haci, pero si keda cu e sala di operacion bieu, sin prueba cu ta bin uno nobo, e seguro lo para e cobertura. E consecuencia segun Schwengle, ta dramatico, pasobra e lo atacha nos industria mas importante, esta turismo. Sin e seguro y e servicionan di sala di operacion, e aerolineanan grandi cu ta exigi pa un destinacion tin bon cuido medico, incluyendo un bon sala di operacion, lo stop su vuelonan. Schwengle a agrega cu un renobacion so di e sala existente no ta un opcion aceptabel pa e compania di seguro. Paso pa paso di e proceso y tur ora cu e wordo pidi pa presenta na Parlamento pa discuti cualkier di su carteranan, e mandatario semper ta para cla pa reuni. Asina e mester ta tambe, Parlamento ta representa pueblo di Aruba y ta wordo respeta como tal y mester adresa nan preocupacionnan, pero tambe mester t'ey pa duna cualkier splicacion necesario, Minister Schwengle ta laga sa. Den e proceso actual esaki no ta diferente y e minister a reuni diferente biaha caba, sea su so of hunto cu conseheronan y esunnan envolvi den e proyecto di hospital cu e comision parlamentario of cu parlamento completo riba e topico di sala di operacion. E plan tabata pa e sala di operacion bin den fase 2 of 3 di e renobacion y expansion di hospital, pero esaki no ta posibel mas y a hal’e padilanti, mirando e situacion cu e compania di seguro y e urgencia cu tin pa un sala di operacion nobo. Entretanto e compania di seguro ta sigui monitor e sala di operacion actual y hasta ta controla pa risico di infeccion y Aruba su hospital ta sigui sigura. No por warda pa e resultadonan di e feitenonderzoek pa sigui cu e proceso como cu esaki lo stanca e proceso y e sala di operacion mester wordo incorpora den e plannan actual.

CUMPLI CU EXIGENCIA

Pa traha y ekipa un sala di operacion nobo cu ta cumpli cu tur exigencia y norma, ta tuma hopi esfuerso y ta tene na cuenta tur e exigencianan y deseonan di e specialistanan, pero tambe tin tur atencion pa loke e personal cu ta traha aden tin di agrega. Esaki ta detayenan hopi tecnico cu mester di hopi atencion y no por wordo atendi pa un minister of un parlamentario, of otro persona cu no ta un experto den e ramo aki. Ademas, cada paso ta wordo controla un di dos biaha pa ta sigur cu e sala di operacion a cumpli cu exigencianan di e specialistanan y e seguro. Finalisando Minister dr. Alex Schwengle ta menciona cu tanten cu tur e procesonan aki ta andando, ta buscando tambe pa logra cu e huur cu gobierno ta paga SOGA pa e edificio pa aña no ta subi. Esaki tambe ta otro topico cu ta na e “top” di e lista di prioridadnan.