Caso di supuesto docente problematico na Colegio hayando rabo

ORANJESTAD – E situacion na Colegio Arubano relaciona cu forma di proceder di un docente Hulandes, ta hayando un rabo largo. Ta trata di e docente van Seijst cu tin un cierto practica pa cu cierto alumnonan, cu cual e alumnonan ey no ta bay bon cu ne, y ta hayando problema. Fuentenan yega na e situacion a informa NoticiaCla.com cu mientras cu tin mas alumno na e scol tin problema cu e docente aki, ta apenas un alumno a entrega keho.

MAYORNAN DI ALUMNONAN ENVOLVI

NoticiaCla.com mientrastanto tin den su poder corespondencia entre e rector di e scol y e mayornan, unda cu ta invita e mayornan pa un combersacion, pero mes momento ta informa nan cu mucho no por wordo haci. “Den bida bo ta siña topa cu hende cu cual bo no ta bay bon, pero tin cu siña biba cu esey” e rector ta contesta e mayornan. Ademas e rector (den e carta cu NoticiaCla.com a pone su man ariba) ta bisa cu no por haci e cambionan manera cu e mayornan di e muchanan envolvi ta pidi. Tin tambe e carta di e mayornan cu ta manda keha e docente oficialmente, y ta pidi pa accion. Algo cu segun contesta di e rector, no lo por sosode. Ora cu NoticiaCla.com a purba tuma contacto cu e mayornan, nan a prefera pa no duna comentario aworaki mirando cu e caso ta canando su caminda y e ta bou di investigacion.

DEFENSA PA E DOCENTE

Mientras cu NoticiaCla.com no a haya contacto cu e directie di scol (a haci e intento), tin informacion ta circula cu e conrector y e rector actual lo ta defendiendo e docente di e materia Hulandes den su caso. Mas informacion cu NoticiaCla.com a ricibi ta cu e docente lo ta uzando ‘formula’ di Hulanda y cu p'esey ningun studiante no ta haya un ‘voldoende’, pero si ta un studiante di Hulanda, si nan ta haya voldoende. E informacion aki lo ta circulando den seno di e alumnonan mes y tambe algun persona yega na scol. NoticiaCla.com no por a comproba si, si esey enberdad ta e caso. Loke cu si nos por a confirma, ta cu tin problema cu e docente en cuestion y cu tin keho contra dje formalmente.