No sa ainda con lo controla seguro di auto na 2016

ORANJESTAD – Mientras cu no tin claridad riba e cambio di ley pa cobra impuesto riba number di auto na 2016, e forma con pa atende cu seguro di auto y su control, tampoco no ta regla ainda. E mandatario di finanza Angel Bermudez recientemente a confirma na NoticiaCla.com cu esaki no ta regla ainda y cu pa comienso di aña, esaki lo keda discuti. “E ta un aspecto cu ta basicamente toca interes di e companianan di seguro, y mi ta kere cu esey tin cu wordo delibera conhunto cu nan”.

INTERES DI SEGURO PA AUTOMOBILISTA CUMPLI

Segun e mandatario, ta na interes di e companianan pa tin e polisa di seguro na nan luga. “Di otro banda pa nos comunidad tin un interes general cu gobierno mester promove mas tanto posibel, cu e doñonan di auto ta sigura pa den caso cu nan haya accidente” e mandatario a bisa. E ta mustra tambe cu no por ta asina si cu ta gobierno so ta carga e tarea aki. “Nos tin cierto ideanan con e companianan di seguro por bira mas activo den e forma di mantencion aki den nan interes” e mandatario a sigui bisa.

LO PAPIA CU SEGURO ORA CU E LEY TA DEFINITIVO

Unabes cu gobierno haya e decision definitivo con e sistema lo ta, lo sinta cu nan (e companianan di seguro) pa elabora cu nan y pa wak con ta yega na un consenso pa loke ta e control y e vigilacion y tambe e cumplimento cu e aspecto di seguro di auto.

GRUPO PERHUDICA

Pa loke ta e grupo cu por sali perhudica cu e regla nobo di cobra via accijns, Bermudez ta sigura cu esaki no ta un grupo grandi, pero si ta bay sinti e efecto. Ta trata di un efecto excesivo segun e mandatario, ora cu e forma cu a propone e cobramento di e plachi di number nobo wordo ehecuta. “P'esey nos ta haciendo cierto ehercicio adicional pa wak kico berdaderamente por ta e efectonan y con lo por cubri cu nan."