Zubieta: Material special pa traha brug nobo pa proteha e area

ORANJESTAD – E tecnologia pa construi e brug nobo pa Spaans Lagoen, ta pa por tin menor impacto posibel na e eco sistema cu e compania Odinsa a compronde cu ta algo hopi sensibel y hopi importante pa e isla. Asina e director di e compania Carlos Zubieta a bisa NoticiaCla.com. Di e parti di Green Corridor, pa e aspecto di tene ‘berde’ esta sostenibel, a mustra cu nan lo utilisa materialnan specifico cu ta yuda cu e cuido di e medio ambiente.

TECNOLOGIA PA TRAHA E BRUG

Entre otro tambe ta papia di e forma con lo traha e brug, usando tipo di tecnologia cu ta moderno cu no ta stroba e naturalesa, y si e strob'e mes, den forma minimo. E iluminacion lo ta estilo led, cu ta reduci consumo di 60% di electricidad. Den e parti di urbanisacion y landscaping, a sigui e politica cu gobierno di Aruba tin.

CANANDO SEGUN PLAN

Zubieta a expresa di ta contento cu e relacion di trabou cu instancianan publico, como tambe otro companianan cu ta participando den e proyecto y e empresanan di utilidad cu kende mester coordina aspectonan esencial. Tur cos ta canando segun e plan di trabou cu a prepara. Actualmente ta den e kilometer 1.4 cu ta forma parti di e prome fase entre aeropuerto y Spaans Lagoen. Tambe a haya splicacion di fasenan proximo manera construccion di brug, division di vianan, incluyendo e fietspad.

MAXIMALISA BENEFICIO DI GREEN CORRIDOR

Di nan banda, Grupo Odinsa tambe kier maximalisa e beneficio di Green Corridor pa e habitantenan den cercania y a planea construccion di entre otro 13 mini parke cu luga pa sinta y instalacionnan di recreo pa mucha. Minister President Mike Eman ta haya esaki un bon idea y kier mira con ta diversifica su funcion. E mini parkenan lo ta ubica riba e trayecto di e proyecto cu ta bay for di Mahuma te San Nicolas y no ta representa un gasto adicional. Den su totalidad, ta premira cu proyecto Green Corridor ta finalisa den mita di 2017.