"Tug Boat" cu a laga zeta lek den lama a haya multa

ORANJESTAD - "Tug Boat" cu a laga zeta lek den lama a haya multa. Como parti di nan tareanan diario, Polisnan Maritimo a ricibi un yamada diaranson pa 9:20 am for di Aruba Ports Authority cu tin un "Tug boat" den waf di Oranjestad ta lek zeta. Cu boto e Polisnan a yega mesora na e sitio y a constata cu berdad tin zeta riba lama na altura di "Fritz Kade". 

TUG BOAT "7 SEAS"

Ta trata di e tug boat "7 Seas" nabegando bou di bandera di Panama y cu tabata mara den waf. E causa ta cu un tubo di zeta den e motor a kibra y alrededor di 15 liter a bay den lama. Nan a tuma medida y a stop esaki mesora. Asina mes e "oilspill" a laga un mancha di 400 X 70 meter den lama cu a drif bay direccion west.

MULTA

Polisnan Maritimo, den deliberacion y cu aprobacion di Fiscal di Ministerio Publico a impone un multa di Afl. 3.500,= y a tuma e tug boat den beslag pendiente di e pago. Pa 4:30 pm agencia di e barco a paga e multa, pa cual Polis a entrega e "tug boat" bek.